ខេត្តព្រះសីហនុ៖ សមត្ថកិច្ច នគរបាលស្រុកព្រៃនប់ បានឲ្យដឹងថា នៅព្រឹកមិញនេះ មានករណីគ្រោះថ្នាក់ចរាចរមួយករណី បានកើតឡើង នៅតាមផ្លូវជាតិលេខ៤ នាខេត្តព្រះសីហនុ បណ្តាលឲ្យបុរសម្នាក់ស្លាប់។
សមត្ថកិច្ចនគរបាលឲ្យដឹងបន្តថា ជនរងគ្រោះដល់អាយុជីវិត ជាភាគីអ្នកបើកបរម៉ូតូ ឈ្មោះ ម៉ាត់ សុះ មានស្រុកកំណើត នៅខេត្តកំពត និងបានមកស្នាក់នៅខេត្តព្រះសីហនុ។
នគរបាលស្រុកព្រៃនប់ បន្តថា ជនរងគ្រោះត្រូវបានរថយន្តធុនធំ បើកគៀរ ក្នុងទិសដៅស្របគ្នា បណ្តាលឲ្យស្លាប់នៅកន្លែងកើតហេតុ។ ហើយថា គ្រោះថ្នាក់ចរាចរនេះ កើតឡើងនៅម៉ោង ៨ និង៤៥នាទី ព្រឹកថ្ងៃទី១ ខែសីហា ឆ្នាំ២០១៩ នាភូមិបត់សិរមាន់ ឃុំ-ស្រុកព្រៃនប់ ខេត្តព្រះសីហនុ តាមផ្លូវជាតិលេខ៤ ចន្លោះគីឡូម៉ែត្រ ១៩១-១៩២ ។
នគរបាលស្រុកព្រៃនប់ និយាយបន្តថា អ្នកបើកបររថយន្តបង្កគ្រោះថ្នាក់ចរាចរបណ្តាលឲ្យស្លាប់មនុស្ស សមត្ថកិច្ចមិនទាន់ស្គាល់អត្តសញ្ញាណទេ ព្រោះបានរត់គេចខ្លួនចេញពីកន្លែងកើតហេតុ មុនពេលសមត្ថកិច្ច បានចុះទៅដល់ទីតាំងកើតមានគ្រោះថ្នាក់ចរាចរនោះ៕ ដោយ៖ ដែន សីមា