ភ្នំពេញ៖ អាជ្ញាធររាជធានីភ្នំពេញ បានថ្លែងថា សេវាកម្មបម្រើប្រជាពលរដ្ឋឃើញថាល្អប្រសើរហើយ ប៉ុន្តែក៏នៅមានចំណុចខ្វះខាតខ្លះដែរ ដែលត្រូវឲ្យមន្ត្រីថ្នាក់ក្រោមជាតិ របស់យើង ត្រូវបំពេញបន្ថែមមានន័យថា ចំណុចល្អៗ យើងបន្តធ្វើឯចំណុចមិនល្អ ត្រូវនាំគ្នាកែឲ្យល្អប្រសើរឡើង។
អាជ្ញាធររាជធានីភ្នំពេញបានជំរុញឲ្យអាជ្ញាធរខណ្ឌសង្កាត់ ត្រូវទទួលប្រជាពលរដ្ឋ ក្នុងការផ្តល់សេវាផ្សេងៗ ជូនពួកគាត់ឲ្យដូចក្រុមហ៊ុនឯកជន និងឲ្យបានដូចគេទទួលភ្លៀវចូលកន្លែងកម្សាន្ត និងសប្បាយភាពនានា ដើម្បីឲ្យសេវានេះ កាន់តែល្អតាមគោលនយោបាយកំណែទម្រង់រដ្ឋបាលវិមជ្ឈការ និងវិសហមជ្ឈការ របស់រាជរដ្ឋាភិបាល។
លោកហួត ហៃ អភិបាលរងរាជធានីបានថ្លែងក្នុងពេលដឹកនាំកិច្ចប្រជុំពិភាក្សា ស្តីពីការជំរុញយន្តការ នៃការផ្តល់សេវាសាធារណ: ជូនប្រជាពលរដ្ឋទាំងអង្គភាពច្រកចេញចូលតែមួយ ថ្នាក់រាជធានី ថ្នាក់ខណ្ឌ ការិយាល័យច្រកចេញចូលតែមួយ និងថ្នាក់សង្កាត់ កាលពីព្រឹកថ្ងៃទី១ ខែសីហា ឆ្នាំ២០១៩ នៅសាលារាជធានីភ្នំពេញ។
លោកហួត ហៃ បានមានប្រសាសន៍លើកឡើងថា យន្តការនៃការផ្តល់សេវាសាធារណ:ជូន ប្រជាពលរដ្ឋទាំងអង្គភាពច្រកចេញចូលតែមួយ ថ្នាក់រាជធានី ថ្នាក់ខណ្ឌ ការិយាល័យច្រកចេញចូលតែមួយ និងថ្នាក់សង្កាត់ ក្រុមបដិសណ្ឋារកិច្ច ត្រូវតែធ្វើឲ្យកាន់តែល្អប្រសើរ និងមានប្រសិទ្ធភាព ដើម្បីអនុវត្តន៍គោលនយោបាយ កំណែទម្រង់រដ្ឋបាលវិមជ្ឈការ និងវិសហមជ្ឈការ របស់រាជរដ្ឋាភិបាល។
លោកបញ្ជាក់ទៀតថា នាពេលនេះ សេវាកម្មបម្រើប្រជាពលរដ្ឋឃើញថាល្អប្រសើរហើយ ប៉ុន្តែក៏នៅមានចំណុចខ្វះខាតខ្លះដែរ ដែលត្រូវឲ្យមន្ត្រីថ្នាក់ក្រោមជាតិ របស់យើង ត្រូវបំពេញបន្ថែមមានន័យថា ចំណុចល្អៗ យើងបន្តធ្វើឯចំណុចមិនល្អ ត្រូវនាំគ្នាកែឲ្យល្អប្រសើរឡើង។ ថ្នាក់ខណ្ឌសង្កាត់ ត្រូវពង្រឹងការផ្តល់សេវា ជូនប្រជាពលរដ្ឋឲ្យបានល្អ ចៀសវាងដាច់ខាតការថ្នាំងថ្នាក់ពីប្រជាពលរដ្ឋ។ “មើលយើងរៀបចំទទួលប្រជាពលរដ្ឋ ក្នុងការផ្តល់សេវានេះ ឲ្យដូចក្រុមហ៊ុនឯកជន និងឲ្យបានដូចគេទទួលភ្លៀវ ចូលកន្លែងកម្សាន្ត និងកន្លែងសប្បាយភាពមើល” ធ្វើឲ្យបានឆាប់មានតម្លាភាព និងមានប្រសិទ្ធភាព។ នៅថ្នាក់ខណ្ឌត្រូវជួយជំរុញការងារ នៃការផ្តល់សេវា ដែលមិនទាន់ដើរត្រូវធ្វើឲ្យដើរ ដើម្បីឲ្យប្រជាពលរដ្ឋឲ្យមកទទួលសេវា។ អ្វីដែលសំខាន់ គឺចៀសវាងមានបញ្ហារហូតដល់អង្គភាពប្រឆាំងអំពើពុករលួយ (ACU) ចាត់វិធានការតាមច្បាប់។ លោកសូមឲ្យច្រកចេញចូលតែមួយរាជធានីភ្នំពេញ ពង្រឹងលើឯកសារថា តើដល់ណាហើយលឿន ឬយឺតមានបញ្ហាអ្វីខ្លះ ពិសេសវិស័យដីធ្លីផ្ទះសម្បែង ជាការសំខាន់ត្រូវរួសរាយរាក់ទាក់ មានសុជីវធម៌ មិនរើសអើង អ្នកមាន អ្នកក្រ ហើយផ្ញើរបាយការណ៍ឲ្យបានលឿនមកក្រុង ដើម្បីឲ្យការងារនេះ បានលឿនជូនប្រជាពលរដ្ឋ៕ ដោយ៖កូឡាប
