តាកែវ៖ អាជ្ញាធរខេត្តតាកែវ បានធ្វើការជំរុញ និងលើកទឹកចិត្តទៅដល់ក្រុមសិស្ស និស្សិតទាំងអស់ត្រូវទៅសិក្សាឈ្វែងយល់អំពីធនធានធម្មជាតិ និងសត្វក្រៀល ដែលជាប្រភេទសត្វកម្រ នៅលើពិភពលោក នៅតំបន់បឹងទេសភាពព្រែកល្ពៅ ដែលស្ថិតនៅក្នុងស្រុកបូរីជលសារ។
ថ្លែងនៅចំពោះមុខប្រធានអនុប្រធានមន្ទីរ អភិបាល អភិបាលរងក្រុងស្រុក សិស្ស និស្សិត ដែលបានចូលរួមនៅក្នុងកិច្ចប្រជុំផ្សព្វផ្សាយប្រកាសព័ត៌មាន របស់គណៈកម្មការជាតិដើម្បីទប់ស្កាត់និងបង្រ្កាបបទល្មើសធនធានធម្មជាតិ ដែលរៀបចំធ្វើឡើងនៅសាលប្រជុំសាលាខេត្ត នាព្រឹកថ្ងៃពុធ ទី៣១ ខែកក្កដា ឆ្នាំ២០១៩ លោក ម៉ឹង វុធី អភិបាលរងខេត្តតាកែវ បានមានប្រសាសន៍ថា ការចុះទៅសិក្សាឈ្វែងយល់នៅតំបន់បឹងធម្មជាតិព្រែកល្ពៅពីសំណាក់ប្អូនៗ សិស្សានុសិស្ស និងនិស្សិត ក៏ដូចជាបងប្អូនប្រជាពលរដ្ឋផ្សេងទៀត វានឹងជួយឲ្យបងប្អូន បានឃើញនូវទេសភាពដ៏ស្រស់ត្រកាល ជីវៈចម្រុះជាច្រើន ពិសេសគឺដឹងកាន់តែច្បាស់អំពី តំបន់ធម្មជាតិនេះ ថាតើយើងត្រូវរៀបចំ និងអភិរក្សតំបន់បឹងព្រែកល្ពៅនេះ ដោយរបៀបណា។
លោក ម៉ឹង វុធី បន្ថែមទៀតថា តាមរយៈសកម្មភាពចុះទៅសិក្សាស្វែងយល់ពីសំណាក់ប្អូនៗនេះ វាប្រាកដជាផ្តល់ផលប្រយោជន៍យ៉ាងច្រើន ទៅដល់បងប្អូនប្រជាពលរដ្ឋនៅទីនោះ ពិសេសគឺប្អូនៗអាចផ្សព្វផ្សាយបន្តពីសក្តានុពលធម្មជាតិ និងជីវៈចម្រុះជាច្រើន ឲ្យមិត្តភក្តិ បងប្អូនបានស្គាល់កាន់តែច្រើន នឹងនាំគ្នាទៅទស្សនាកម្សាន្តឲ្យកាន់តែច្រើនឡើងថែមទៀត ។
អភិបាលរងខេត្តរូបនេះ បញ្ជាក់ថា ប្រសិនបើយើងនាំគ្នាទៅទស្សនាតំបន់បឹងធម្មជាតិ ព្រែកល្ពៅនេះកាន់តែច្រើន និងកាន់តែទូលំទូលាយ វាក៏ជាការលើកទឹកចិត្តដ៏ប្រពៃផងដែរ ទៅដល់អាជ្ញាធរ មន្រ្តីបរិស្ថាន ដែលជាអ្នកការពារនៅតំបន់នេះ ឲ្យពួកគាត់សប្បាយចិត្ត និងមានអារម្មណ៍ថា នឹងនៅតែការពារតំបន់នឹងមិនឲ្យមានការកាប់ទន្ទ្រានពីក្រុមណាមួយឡើយ ។
បើតាមលោក ម៉ឹង វុធី ការចូលរួមចំណែកក្នុងការទស្សនាតំបន់បឹងធម្មជាតិព្រែកល្ពៅនេះ វានឹងធ្វើឲ្យតំបន់នេះ ក្លាយទៅជាតំបន់ទេសចរណ៍ធម្មជាតិដ៏ទាក់ទាញ និងជាតំបន់អភិរក្សពេញលេញមួយ សម្រាប់ឲ្យសត្វក្រៀលមកស្វែងរកចំណីអាហារនៅទីនេះ ពិសេសគឺផ្តល់ផលប្រយោជន៍ជាច្រើនដល់សហគមន៍របស់យើងថែមទៀតផង ៕ ដោយ៖តាកែវ
