ខេត្តស្វាយរៀង៖យ៉ាងហោចណាស់មនុស្ស៤នាក់ បានរងរបួសធ្ងន់ស្រាល ដោយសារគ្រោះថ្នាក់ចរាចរគួរឲ្យរន្ធត់មួយ រវាងរថយន្តធុនត្រា បើកបរដោយជនជាតិចិនប្រើប្រាស់ល្បឿនលឿន បុកជាមួយរថយន្តសាំងយ៉ុង បញ្រ្ចាសគ្នាពេញទំហឹង។
ករណីគ្រោះថ្នាក់ចរាចរនេះ បានកើតឡើងកាលពីវេលាម៉ោងប្រមាណ៤និង៤៤ទៀបភ្លឺ ឈានចូលថ្ងៃទី១ សីហា ឆ្នាំ២០១៩ នៅលើផ្លូវជាតិលេខ១ មុខសាលាបឋមសិក្សាប៊ុនរ៉ានី ហ៊ុន សែន ជីភូ ស្ថិតក្នុងភូមិ ជ្រៃធំ សង្កាត់ ព្រៃអង្គញ់ ក្រុងបាវិត ខេត្តស្វាយរៀង។
បើយោងតាមសាក្សីបានឲ្យដឹងថា មុនកើតហេតុ មានជនជាតិចិនម្នាក់ មិនត្រូវបានស្គាល់ឈ្មោះ បានបើករថយន្ដ ម៉ាកធុនត្រា ពណ៌ក្រហម ពាក់ស្លាកលេខ ភ្នំពេញ ២AX-១៧១៣ និងអ្នករួមដំណើរម្នាក់ លើផ្លូវជាតិលេខ១ ខណៈប្រើប្រាស់ល្បឿនលឿនខ្វះប្រុងប្រយ័ត្ន។ ប្រភពបានបន្តទៀតថា លុះមកដល់ចំណុចកើតហេតុខាងលើ ស្រាប់តែទៅបុកនឹងរថយន្ដមួយគ្រឿង ម៉ាកសាំងយ៉ុង ពណ៌ស ឆ្នូតខ្មៅ ពាក់ផ្លាកលេខ ភ្នំពេញ ២AI-៨៣០៨ ជិះគ្នា៤នាក់ ក្នុងទិសដៅបញ្ច្រាសគ្នា បុកយ៉ាងពេញទំហឹង បណ្ដាលឲ្យបុរសជាអ្នកបើករថយន្ដសាំងយ៉ុង គាបជាប់នៅក្នុងកាប៊ីនរងរបួសធ្ងន់ និង៣នាក់ទៀតរងរបួសធ្ងន់ ស្រាល។
ក្រោយបង្កហេតុ អ្នកបើករថយន្តធុនត្រា និងអ្នករួមដំណើរជាជនជាតិចិន ត្រូវបានសមត្ថកិច្ចឃាត់ខ្លួនមកសាកសួរផងដែរ។
អ្នករងរបួសទាំង៤នាក់ ត្រូវបានសមត្ថកិច្ចនគរបាល បញ្ជូនទៅសង្រ្គោះនៅក្នុងមន្ទីរពេទ្បង្អែកជីភូក្រុងបាវិត និងធ្វើការវាស់វែង រថយន្តទាំង២គ្រឿង មករក្សាទុកនៅអធិការដ្ឋាននគរបាលក្រុងបាវិត ដើម្បីរង់ចាំដោះស្រាយតាមច្បាប់នាពេលក្រោយ៕ ដោយ៖វ៉ៃកូ
