សៀមរាប៖ លោកទិត្យ ណារ៉ុង ស្នងការនគរបាលខេត្តសៀមរាប បានឲ្យដឹងថា នៅល្ងាច ថ្ងៃទី០១ ខែសីហា ឆ្នាំ២០១៩ កម្លាំងសមត្ថកិច្ចនគរបាលយើង បានបង្ក្រាបករណីបើកល្បែងសុីសងខុសច្បាប់តាមប្រព័ន្ធអុិនធើណិត (Game Online) ដែលមានទីតាំងស្ថិតនៅផ្ទះលេខ ១៧ ផ្លូវ៨ បុរី ដឹព្រីមៀភែលេស ភូមិគ្រួស សង្កាត់ស្វាយដង្គំ ក្រុង/ខេត្តសៀមរាប ។
លោកបានបន្តថា ការបង្ក្រាបនេះ ដឹកនាំសម្របសម្រួលនីតិវិធីដោយលោក រៀម ច័ន្ទម្នី ព្រះរាជអាជ្ញារង អមសាលាដំបូងខេត្តសៀមរាប ។ កម្លាំងរបស់យើងបានឃាត់ខ្លួនជនសង្ស័យចំនួន ០៧នាក់ ភេទប្រុស ជនជាតិចិន រួមនឹងវត្ថុតាង កុំព្យូទ័រយួរដៃ ចំនួន ០៥គ្រឿង, ទូរស័ព្ទដៃ ចំនួន ១៥គ្រឿង, ម៉ូដឹម wifi ចំនួន ០៣, សុីមកាត មួយចំនួន រួមទាំងសម្ភារៈមួយចំនួនទៀត ។ ជនសង្ស័យបានបញ្ជូនមកសាកសួរនៅការិយាល័យ ។
បច្ចុប្បន្នសមត្ថកិច្ចយើងកំពុងកសាងសំណុំរឿងបញ្ជូនទៅតុលាការ ៕ ដោយ៖កូឡាប