ឧត្តមសេនីយ៍ទោ អ៊ុច សុខុន បានថ្លែងថា ពីថ្ងៃនេះទៅមន្ត្រីនគរបាលរូបណាដែលផ្តល់ព័ត៌មានផ្ទៃក្នុងអង្គភាពទៅឲ្យតតីយជនដោយគ្មានការអនុញ្ញាតនឹងត្រូវទទួលទណ្ឌកម្មស្របតាមវិន័យលេខ០០៦របស់កងកម្លាំងនគរបាលជាតិ។
នៅថ្ងៃទី ១ ខែ សីហា ឆ្នាំ ២០១៩ ក្នុងកិច្ចប្រជុំ បូកសរុបលទ្ឋផលការងារខែ កក្កដា ឆ្នាំ ២០១៩ និងលើកទិសដៅ ការងារខែ សីហា ឆ្នាំ ២០១៩ ដើម្បីអនុវត្តបន្ត លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង បានមានប្រសាសន៍ថា ចាប់ពីថ្ងៃនេះតទៅមន្ត្រីនគរបាលរូបណា ដែល(ផ្តល់ព័ត៌មានពីផ្ទៃក្នុងអង្គភាព) ឲ្យទៅបុគ្គលណាមួយ ដោយគ្មានការអនុញ្ញាតពីថ្នាក់ដឹកនាំ មន្ត្រីនគបាលរូបនោះ នឹងត្រូវទទួលទណ្ឌកម្មស្របតាមវិន័យលេខ០០៦របស់កង កម្លាំងនគរបាលជាតិ នៅពេលដែលមានការស៊ើបអង្កេតច្បាស់លាស់ ។
លោក ឧត្តមសេនីយ៍ទោ ស្នងការ បានថ្លែងបញ្ជាក់យ៉ាងដូច្នេះ បន្ទាប់ពីកត់សម្គាល់ឃើញថា ក្នុងមួយរយ:ពេលចុងក្រោយនេះ បញ្ហាអ្វីបន្តិចបន្តួចនៅក្នុងផ្ទៃក្នុងអង្គភាពនគរបាលជាតិ ក៏មនុស្សដទៃនៅក្រៅអង្គភាព(ដឹងដែរ) ដែល បញ្ហានេះ ត្រូវបានមនុស្សមួយចំនួនដែលមានចេតនាបំផ្លិចបំផ្លាញសាមគ្គីភាពផ្ទៃក្នុងនគរបាលជាតិ យកទៅបំផ្លើសបំភ្លៃ បន្ថែមបន្ថយខ្លឹមសារ ហើយធ្វើការផ្សព្វផ្សាយជាសាធារណ:ក្នុងបណ្តាញព័ត៌មានសង្គម បង្កឲ្យមានភាពអាប់អួរ ភ័ន្តច្រឡំនិងបាត់បង់កិត្តិយសអង្គភាព និងចុងក្រោយធ្វើឲ្យមន្ត្រីនគរបាលក្នុងអង្គភាព មើលមុខគ្នាមិនចំ បាត់បង់ជំនឿទុកចិត្ត បាត់បង់សាមគ្គីភាពផ្ទៃក្នុង និងជះឥទ្ឋិពលមិនល្អដល់ការដឹកនាំរបស់ថ្នាក់ដឹកនាំស្នងការដ្ឋានទាំងមូល ។
លោកបានបន្តថា បើមន្ត្រីរូបនោះជាថ្នាក់ដឹកនាំវិញ គឺជាមន្ត្រីដែលមិនគួរឲ្យទទួលខុសត្រូវលើការងារនិងជាអ្នកដឹកនាំទេព្រោះមន្ត្រីរូបនោះពោរពេញដោយការច្រណែនឈ្នានីសនិងប្រកបដោយការសង្ស័យគ្រប់រឿង ដែលក្នុងមួយជីវិតរបស់គេ មិនមានសេចក្តីសុខឡើយ។
សូមបញ្ជាក់ជូនថា ស្របតាមលក្ខន្តិក: ដោយឡែក នៃក្របខ័ណ្ឌមន្ត្រីនគរបាលជាតិកម្ពុុជា ត្រង់មាត្រាទី២២មាត្រាទី ២៣ និងមាត្រាទី២៤ បានហាមឃាត់ដាច់ខាតចំពោះការផ្តល់ព័ត៌មាន ដែលជាការសម្ងាត់ខាងវិជ្ជាជីវៈ របស់នគរបាលជាតិ ទៅតតីយជនដោយគ្មានការអនុញ្ញាត និងវិន័យលេខ០០៦ របស់កងកម្លាំងនគរបាលជាតិ បានចែពីការដាក់ទណ្ឌកម្ម ចំពោះមន្ត្រីនគរបាលជាតិណា ដែលផ្តល់ព័ត៌មាន ដោយគ្មានការអនុញ្ញាត ៕ ដោយ៖កូឡាប