បន្ទាយមានជ័យ ៖ “សូមគ្រប់គ្នាចូលរួម ថែរក្សាការពារអោយនៅតែជា “ភូមិស” កុំអោយក្លាយទៅជា “ភូមិខ្មៅ ប្រផេះ ក្រហម លឿង…”។ នេះបើតាមលោកស្នងការនគរបាលខេត្តបន្ទាយមានជ័យបានអំពាវនាវថា ដើម្បីពង្រឹងនិងរក្សាបាននូវសន្តិសុខ សណ្តាប់ធ្នាប់ និងសុវត្ថិភាពក្នុងមូលដ្ឋានកាលពីថ្ងៃទី២មករាឆ្នាំ២០១៨។
លោកនិយាយក្នុងពេលសំណេះសំណាលជាមួយមន្ត្រីអាជ្ញាធរ ភូមិ-សង្កាត់ និងកម្លាំងប្រជាការពាររាប់រយនាក់ ភូមិមកពី៤សង្កាត់ គឺសង្កាត់ អូរអំបិល កំពង់ស្វាយ ព្រះពន្លា និងសង្កាត់ទឹកថ្លា ក្នុងក្រុងសិរីសោភ័ណ នាស្នងការដ្ឋាននគរបាលខេត្តបន្ទាយមាន។
លោកឧត្តមសេនីយ៍ អាត់ ខែម ស្នងការបាននិយាយបន្តថា៖ ការជួបមានគោលបំណងជាការក្រើនរំលឹកទាក់ទិនស្ថានភាពសន្តិសុខ សណ្តាប់ធ្នាប់និងសុវត្ថិភាពក្នុងមូលដ្ឋានភូមិ សង្កាត់ ។ ពោលគឺស្នើឲ្យអាជ្ញាធរភូមិ សង្កាត់ និងកម្លាំងប្រជាការពារ រួមសហការជាមួយជាមួយកងកម្លាំងនគរបាលប៉ុស្តិ៍រដ្ឋបាលសង្កាត់ និងពលរដ្ឋធនាឲ្យបាននូវ”សន្តិសុខល្អ ” ឬដែលផែនការភូមិឃុំសុវត្ថិភាពយើងហៅថា “ភូមិស”។ ដូច្នេះយើងត្រូវរួមដៃគ្នាថែរក្សា ការពារគុណតម្លៃនិងស្ថានភាពមូលដ្ឋានយើងកុំឲ្យក្កាយជា “សហគមន៍ ភូមិឬសង្កាត់ខ្មៅ ប្រផេះ ឬ ក្រហមលឿង” ឲ្យសោះ។
លោកស្នងការបន្ថែមថា ចំពោះបញ្ហាផលិត ដាំ លក់ ចែកចាយនិងសេព គ្រឿងញៀន បញ្ហាក្រុមក្មេងទំនើងជាដើមត្រូបតែលុបបំបាត់ទាំងស្រុង។ ជាមួយគ្នានោះ លោកឧត្តមសេនីយ៍ក៏និយាយពីភារកិច្ចនិងតួនាទីរបស់អាជ្ញាធរ និងកម្លាំងប្រជាការពារ បងប្អូនពលរដ្ឋ មិនមានសិទ្ធប្រើប្រាស់អាវុធឬក៏ស្រាវជ្រាវចាប់ជនល្មើសក៏ដោយ ប៉ុន្តែបើបទល្មើស ជាក់ស្តែងគឺមានសិទ្ធបង្ក្រាបនិងចាប់ជនប្រព្រឹត្តល្មើសយកមកប្រគល់ឲ្យសមត្ថកិច្ច ។
សូមបញ្ជាក់ដែរថា ក្នុងអំឡុងពេលនេះសមត្ថកិច្ចនិងអាជ្ញាធរ ពិសេសនគរបាលនៅនៅខេត្តបន្ទាយមានជ័យបានបើកយុទ្ធនាការពង្រឹងសន្តិសុខ សុវត្ថិភាព៕ ដោយ ៖ បន្ទាយ
