រដ្ឋមន្ដ្រីក្រសួងព័ត៌មាន ណែនាំដល់ប្រធានមន្ទីរព័ត៌មានខេត្ដប៉ៃលិន ដែលទើបតាំងតាំងថ្មី ត្រូវពង្រឹងសាមគ្គីភាពផ្ទៃក្នុង និងប្រមូលផ្តុំមន្ត្រី ក្រោមឱវាទមកធ្វើការងារជាសមូហភាពរួមគ្នា ព្រោះការងារព័ត៌មានមិនអាចធ្វើតែម្នាក់ឯងបាននោះទេ ពិសេសត្រូវមានកិច្ចសហការល្អ ជាមួយមន្ទីរជុំវិញខេត្ត និងគ្រប់បណ្តាស្រុកនៅក្នុងខេត្ដ។
ក្នុងពិធីប្រកាសកាសចូលកាន់តំណែងប្រធានមន្ទីរព័ត៌មាន ខេត្តប៉ៃលិន កាលពីថ្ងៃទី០១ ខែសីហា ឆ្នាំ២០១៩ នៅសាលាខេត្ដប៉ៃលិន លោក ខៀវ កាញារីទ្ធ រដ្ឋមន្ដ្រីក្រសួងព័ត៌មានបានមានប្រសាសន៍ថា ការរួមសហការ គ្នានេះ គឺដើម្បីអាចឆ្លើយតបបានទាន់ពេលវេលា ទៅនឹងបញ្ហាកើតមានឡើងនៅ ក្នុងខេត្ត យើងអាចឆ្លើយតប មកស្រាយទាន់ពេលវេលា ពិសេសការបកស្រាយរបស់ មន្ទីរជំនាញទាក់ទងទៅនឹងរឿងអ្វីមួយឱ្យបានច្បាស់លាស់។ លោកបានលើកឡើងថា ការដាក់ប្រធានមន្ទីរព័ត៌មានថ្មី នាពេលនេះ គឺដើម្បីរៀបចំឱ្យមានជាស្ថានីយវិទ្យុ និងទូរទស្សន៍ ក្នុងខេត្តប៉ៃលិន ពិសេសការរៀបចំ TV Onlione ព្រោះថា TV នេះ មានការចំណាយតិច ប៉ុន្តែវាមានភាពងាយស្រួលក្នុងការបើកមើលបាននៅគ្រប់ទីកន្លែង ទីណាពេលណាក៏បាន។ លោករដ្ឋមន្ដ្រីបន្ដថា ក្រសួងព័ត៌មានសហការជាមួយក្រុមហ៊ុនឯកជន គ្រោងបង្កើតជាប្រព័ន្ធទូរទស្សន៍ OTT ដែលអាចបើកមើលការផ្សាយគ្រប់ប៉ុស្តិ៍ ហើយក៏អាចមើល ត្រឡប់ក្រោយវិញបាន នូវកម្មវិធីផ្សាយរួចរយៈពេល១ សប្តាហ៍។
លោករដ្ឋមន្ដ្រីសង្ឃឹមថា លោកអភិបាលខេត្ត នឹងបន្តជួយដល់មន្ទីរព័ត៌មានខេត្តប៉ៃលិន ឱ្យកាន់តែរីកចម្រើនបន្ថែម ទៅមុខទៀត ដើម្បីផ្សព្វផ្សាយព័ត៌មាន និងដំណឹងផ្សេងៗជូនប្រជាពលរដ្ឋ ក្នុងខេត្តបានស្តាប់ ដឹងនូវព្រឹត្តការណ៍ថ្មីៗដែលកើតមានឡើង នៅក្នុង និងក្រៅប្រទេស ជាពិសេសដំណើរការអភិវឌ្ឍនៅក្នុងខេត្ដ នៅទូទាំងប្រទេស។
លោកផាន់ ចាន់ធុល អភិបាល នៃគណៈអភិបាលខេត្ត ប៉ៃលិន បានសម្ដែងការគាំទ្រចំពោះការសម្រេចចិត្តរបស់ក្រសួង ដែលព័ត៌មានបានផ្តល់ការទុកចិត្ត តែងតាំង លោក យូ ពៅ ជាប្រធានមន្ទីរព័ត៌មាន ដើម្បីដឹកនាំអង្គភាពព័ត៌មាននេះ ក្នុងការចូលរួមជាមួយរដ្ឋបាលខេត្ត និងរដ្ឋបាលក្រុង ស្រុក សង្កាត់ ឃុំ បន្តបំពេញភារកិច្ចបម្រើជាតិ និងប្រជាជន ទៅតាមបេសកកម្មរបស់ ក្រសួង គឺ ប្លែក លឿន ទុកចិត្តបាន នៅពេលណា នៅទីណាក៏បាន ព្រមទាំងទទួលបានជោគជ័យថ្មីៗ និងចូលរួមជំរុញការអភិវឌ្ឍលើគ្រប់វិស័យក្នុងខេត្តប៉ៃលិន។ លោកអភិបាលខេត្ត សង្ឃឹមយ៉ាងមុតមាំថា លោកប្រធានមន្ទីរព័ត៌មានថ្មី នឹងខិតខំយកអស់កម្លាំងកាយចិត្ត ក្នុងការបំពេញភារកិច្ចក្នុងមុខតំណែងនេះ ប្រកបដោយស្មារតីទទួលខុសត្រូវ និងបន្ដនូវសាមគ្គីភាពខ្ពស់និងធ្វើឱ្យមានសុខដុមនីយកម្មក្នុងអង្គភាពជាមិនខាន។ លោកបានចូលរួមផ្តល់នូវគោលគំនិត មួយចំនួន គឺត្រូវយកចិត្តទុកដាក់ក្នុងការងារគ្រប់គ្រងផ្នែកព័ត៌មាននេះ ឱ្យបានកាន់តែរឹងមាំ មានសាមគ្គីភាព ឯកភាពផ្ទៃក្នុង ដោយត្រូវយកគោលការណ៍ប្រជាធិបតេយ្យ ធ្វើជាត្រីវិស័យក្នុងការដឹកនាំនោះគឺគោលការណ៍សមូហភាព ដឹកនាំ បុគ្គលម្នាក់ៗជាអ្នកទទួលខុសត្រូវ។
បើតាមព្រះរាជក្រឹត្យ ត្រូវបានតែងតាំង លោកស្រី ស្រ៊ី ចាន់អេង អតីតប្រធានមន្ទីរ ព័ត៌មានខេត្តប៉ៃលិន ជាទីប្រឹក្សាក្រសួងព័ត៌មាន ហើយតាមប្រកាសរបស់ក្រសួងព័ត៌មាន ត្រូវបានតែងតាំង លោក យូ ពៅ ជាប្រធានមន្ទីរព័ត៌មានព័ត៌មាន ខេត្តប៉ៃលិនថ្មី ៕ ដោយ៖កូឡាប
