ខេត្តព្រះសីហនុ៖ អភិបាល នៃគណៈអភិបាលខេត្តព្រះសីហនុ មានប្រសាសន៍ថា ក្នុងនាមរដ្ឋបាលខេត្ត រូបលោក បានអំពាវនាវដល់ម្ចាស់សំណង់គ្រប់ប្រភេទ ដែលបានសាងសង់រំលោភ ទៅលើដីចំណីផ្លូវ ប្រឡាយទឹក អូរ
និងលូបង្ហូរទឹក ត្រូវចូលរួមសហការតាមការអំពាវនាវ និងការណែនាំ ក៏ដូចជាការជូនដំណឹង របស់អាជ្ញាធរ ដោយត្រូវធ្វើការរុះរើចេញវិញជាបន្ទាន់។
លោក គួច ចំរើន បញ្ជាក់ថា ការកំណត់ឲ្យម្ចាស់សំណង់សង់ខុសច្បាប់ឲ្យរុះរើចេញពីមាត់អូរប្រឡាយ និងលូបង្ហូរទឹកជាដើមនេះ ប្រយោជន៍ដើម្បីបើកច្រកឲ្យអាជ្ញាធរ ជួយពន្លឿនធ្វើការដោះស្រាយ បញ្ហាប្រឈមនានា ដើម្បីឆ្លើយតបបញ្ហាអសកម្មផ្សេងៗ កំពុងកើតមាន ក្នុងមូលដ្ឋាន របស់បងប្អូនប្រជាពលរដ្ឋ ដូចជាបញ្ហា អនាម័យបរិស្ថាន បញ្ហាសណ្តាប់ធ្នាប់សាធារណៈ និងបញ្ហាជំនន់ទឹកភ្លៀងជាដើម។
ព្រមជាមួយគ្នានេះ លោក គួច ចំរើន អភិបាលខេត្តព្រះសីហនុ បញ្ជាក់ថា រាល់ថ្ងៃនេះ មន្ត្រីរដ្ឋបាលគ្រប់ថ្នាក់ ក៏កំពុងចុះអនុវត្តន៍ និងមានវិធានការផ្លូវច្បាប់ជាបន្តបន្ទាប់ផង ទៅលើម្ចាស់សំណង់ ដែលសង់ខុសច្បាប់នាំឲ្យប៉ះពាល់ដល់ដីចំណីផ្លូវ លូ អូរ និងប្រឡាយទឹក បង្កឲ្យស្ទះចរន្តទឹកហូរបង្កើតឲ្យមានទឹកជនលិចផ្លូវ និងលំនៅឋាន របស់ប្រជាពលរដ្ឋជាដើម៕ ដោយ៖ ដែន សីមា