ខេត្តព្រះសីហនុ៖ កាលពីរសៀលថ្ងៃទី១ ខែសីហា ឆ្នាំ២០១៩ លោក គង់ វិបុល ប្រតិភូរាជរដ្ឋាភិបាល ទទួលបន្ទុក ជាអគ្គនាយក នៃអគ្គនាយកដ្ឋានពន្ធដារ បានអញ្ជើញជួបប្រជុំជាមួយរដ្ឋបាលខេត្តព្រះសីហនុ ដើម្បីពិនិត្យពិភាក្សា ទៅលើការងារគ្រប់គ្រងប្រមូលចំណូលពន្ធ ក្នុងខេត្តព្រះសីហនុ និងបញ្ហាប្រឈមមួយចំនួន។
ទាក់ទិនបញ្ហានេះ លោក គួច ចំរើន អភិបាលនៃគណៈអភិបាលខេត្តព្រះសីហនុ ក៏បានលើកឡើងនៅក្នុងកិច្ចប្រជុំប្រចាំខែកក្កដា កន្លងមកនេះថា ម្ចាស់ផ្ទះជួលនឹងមិនត្រូវធ្វើការពិន័យនោះទេ ក្នុងករណីមានការភ្ញាក់រលឹក ហើយចូលរួមបំពេញកាតព្វកិច្ចបង់ពន្ធរដ្ឋ ឲ្យបានត្រឹមត្រូវ តាមតម្លៃជួលផ្ទះ និងដីជាក់ស្តែង។ លោកថា បើពុំដូច្នេះទេ រដ្ឋបាលខេត្តព្រះសីហនុ នឹងមានវិធានការដូចខាងក្រោម៖
១- តម្រូវឲ្យម្ចាស់ផ្ទះជួលធ្វើការបង់រំលឹកប្រាក់ពន្ធ ដែលនៅខ្វះដោយគិតចាប់ពីថ្ងៃចុះកិច្ចសន្យាជួលមក
២- ក្នុងករណីរកឃើញម្ចាស់ផ្ទះជួល ធ្វើកិច្ចសន្យាក្លែងបន្លំលាក់ពន្ធ (គឺធ្វើកិច្ចសន្យាជាមួយអ្នកជួលដាក់ស្តង់មួយ និងធ្វើកិច្ចសន្យាមួយទៀត ក្នុងការក្លែងបន្លំពន្ធ) បញ្ហានេះ គឺបានជាប់ពាក់ព័ន្ធអំពើពុករលួយ ហើយរដ្ឋបាលខេត្តព្រះសីហនុ នឹងត្រូវចាត់បញ្ជូនករណីនេះទៅ អង្គភាពប្រឆាំងអំពើពុករលួយ (ACU) ដើម្បីបន្តនីតិវិធីទៀត៕ ដោយ៖ ដែន សីមា