ភ្នំពេញ៖ ស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី២ខែសីហានេះ បានរបាយការណ៍ទាំងស្រុងករណីអគ្គិភ័យនៅផ្សារទំនើបអូឡាំព្យា។ នៅម៉ោង៨:៣០នាទី ថ្ងៃទី២ ខែសីហា ឆ្នាំ២០១៩ នៅក្នុងការដ្ឋានសំណង់អូឡាំព្យា ដែលមានទីតាំងផ្លូវ217 ភូមិ7 សង្កាត់វាលវង់ ខណ្ឌ7មករា មានករណីអគ្គិភ័យមួយ កើតឡើងនៅចំណុចជាន់ក្រោមដី (សំណង់ស្ថិតត្រង់ទល់មុខវត្តព្រះពុទ្ធ) ករណីឆេះនេះបណ្តាលមកពីឆ្លងចរន្តអគ្គិសនី។
នគរបាល បានឲ្យដឹងថា ប្រើប្រាស់រថយន្តពន្លត់អគ្គិភ័យចំនួន32គ្រឿង ក្នុង1គ្រឿង រត់ចំនួន3ដង ប្រើប្រាស់ទឹកអស់ចំនួន38.4000ម៉ែត្រគូប។ ផ្ទៃក្រឡាបន្ទប់ដែលឆេះ មានបណ្តោយប្រវែង20ម៉ែត្រ និងទទឹងប្រវែង20ម៉ែត្រ បណ្តាលឲ្យសម្ភារខូចខាតគ្រឿងសំណង់មួយចំនួន។
ករណីគ្រោះថ្នាក់អគ្គិភ័យនេះ មិនបង្កឲ្យមានរងរបួស ឬស្លាប់ឡើយ។
លោកឧត្តមសេនីយ៍ទោ នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យ ដែលចុះអន្ដរាគមន៍ ជាមួយលោក មាន ចាន់យ៉ាដា អភិបាលរងរាជធានីភ្នំពេញ និងអ្នកគ្រប់គ្រងផ្សារទំនើប The Olympia Mall បានឲ្យដឹងថា តាមការសន្និដ្ឋានជំហានដំបូង មូលហេតុដែលនាំឲ្យមានគ្រោះអគ្គិភ័យនេះ គឺផ្ដើមចេញពីជាងផ្សារដែក ក្នុងឃ្លាំងស្ដុកសម្ភារ ហើយខ្ទាតកម្ទេចភ្លើងទៅប៉ះជាមួយកេសស្នោ និងខ្សែភ្លើងនៅក្បែរនោះ ទើបបង្កជាអគ្គិភ័យតែម្ដង។
លោកឧត្តមសេនីយ៍ទោ នេត វន្ថា បានបន្ដទៀតថា នៅពេលមានភ្លើងឆេះភ្លាមៗ ក្រុមជាងដែលកំពុងតែផ្សារដែកនោះ បាននាំគ្នាយកបំពុងពន្លត់អគ្គិភ័យបាញ់ដែរ ប៉ុន្ដែមិនអាចគ្រប់គ្រងស្ថានការបាន ហើយពួកគេបានគេចចេញពីកន្លែងឆេះ ដើម្បីរាយការណ៍ជូនសមត្ថកិច្ចមកជួយអន្ដរាគមន៍ភ្លាមៗ។
ប្រធាននាយកដ្ឋានបង្ការ និងពន្លត់អគ្គិភ័យរូបនេះ បានបន្ថែមទៀតថា សម្រាប់ប្រតិបត្តិការនៃការជួយសង្គ្រោះវិញ សមត្ថកិច្ចមានផលលំបាកយ៉ាងខ្លាំង ព្រោះតែស្ថានភាពបន្ទប់មានបណ្ដោយវែង ហើយស្ថានភាពឆេះនោះទៀតសោត គឺសុទ្ធតែកេសស្នោ និងខ្សែភ្លើង ដែលធ្វើឲ្យផ្សែងឈួលខ្លាំង ពិបាកក្នុងការដកបង្ហើមពេលចូលសង្គ្រោះ។ ប៉ុន្ដែដោយសារសមត្ថកិច្ចមានជំនាញច្បាស់លាស់ បានប្រើប្រាស់នូវបំពង់ខ្យល់ជំនួយ ពាក់ដើម្បីចុះទៅបាញ់ពន្លត់ទីតាំងដែលមានភ្លើងឆេះ៕ ដោយ៖កូឡាប