ខេត្តកោះកុង៖ ស្រុកមណ្ឌលសីមា ជាស្រុកមួយជាប់ ជាមួយទីរួមខេត្តកោះកុង កន្លងមករដ្ឋបាលស្រុកនេះ បានខិតខំប្រឹងប្រែងប្រើគ្រប់មធ្យោបាយ ទាំងសម្ភារ: និងស្មារតី ថែមទាំងបានសហការជាមួយក្រុមហ៊ុន សម្អាត ប្រមូល និងដឹកជញ្ជូនសំរាម។ ប៉ុន្តែការងារនេះ ពុំទាន់បានឆ្លើយតបតាមគោលបំណង និងសេចក្តីត្រូវការ នៃភាពស្អាត ឬនៅឡើយទេ ខណៈ ប្រជាពលរដ្ឋមួយចំនួន នៅតែចោលសំរាមតាមទីសាធារណៈ តាមមាត់លូ ដែលជាប្រព័ន្ធបង្ហូរទឹក បង្កឲ្យមានការកកស្ទះតាមតំបន់មួយចំនួននាមូលដ្ឋាននេះ។
ទាក់ទិនបញ្ហានេះ លោក ហាក់ ឡេង អភិបាលស្រុកមណ្ឌលសីមា និងក្រុមហ៊ុនប្រមូលសំរាម បានជំរុញឲ្យបងប្អូនប្រជាពលរដ្ឋនៅតាមមូលដ្ឋាន ត្រូវចូលរួមសហការគ្នា សម្អាត ប្រមូល វិចខ្ចប់ ឲ្យបានត្រឹមត្រូវ ដើម្បីឲ្យខាងក្រុមហ៊ុនមានភាពងាយស្រួល ប្រមូលទុកដាក់តាមបែបបច្ចេកទេសស្តង់ដារ បើពុំដូច្នោះទេ និងចាត់វិធានការតាមដាន គ្រប់ភូមិ ឃុំ សង្កាត់ ដើម្បីវែកមុខរកជនខិលខូច យកមកអប់រំ និងណែនាំឲ្យបានយល់ដឹងពីបរិស្ថាន។
លោកអភិបាលបន្តថា មានប្រព័ន្ធលូបង្ហូរទឹកមួយកន្លែង មានទីតាំងនៅចំណុចផ្លូវកែង ទល់មុខផ្សាភូមិថ្មី ភូមិចាំយាម ឃុំបាក់ខ្លង មនុស្សមិនតិចពី២០នាក់ ក្នុងមួយថ្ងៃ បានបោះចោលសំរាម គ្រប់ប្រភេទ ក្នុងមាត់លូ បើតាមសេចក្តីរាយការណ៍ ពីពលរដ្ឋ ដែលប្រកបរបរជាជាងកាត់សក់នៅក្បែរនោះ។ លោកថា ករណីនេះ បន្ទាប់ពីរដ្ឋបាលស្រុក បានចាត់មន្ត្រីឲ្យចុះតាមដាន និងឃ្លាំមើល អាជ្ញាធរភូមិ ចាំយាម រកឃើញមុខជនប្រព្រឹត្តពិតប្រាកដមែន។
ត្រង់ចំណុចនេះ លោក ហាក់ ឡេង អភិបាលស្រុកមណ្ឌលសីមា និងក្រុមហ៊ុនប្រមូលសំរាម សម្រេចឲ្យកាយចេញជាបន្ទាន់ បន្ទាប់ពីកោះអញ្ជើញមកណែនាំធ្វើមិច្ចសន្យា មុននឹងឈានដល់ការផាកពិន័យ។
លោក អភិបាលស្រុកមណ្ឌលសីមា បន្ថែមទៀតថា ដើម្បីធ្វើឲ្យស្រុកមណ្ឌលសីមា ប្រែក្លាយមុខមាត់ថ្មី មានសោភ័ណភាព សណ្តាប់ធ្នាប់ អនាម័យ និងបរិស្ថានស្អាត ជាទីប្រជុំជនបៃតង ដែលជាទីកន្លែងផ្តល់នូវសុខុមាលភាពរស់នៅដល់ប្រជាពលរដ្ឋ ភ្ញៀវទេសចរជាតិ អន្តរជាតិ និងយោងតាមច្បាប់ស្តីពី (កិច្ចការ ការពារបរិស្ថាន និងការគ្រប់គ្រងធនធានធម្មជាតិ) ចុះថ្ងៃទី ២៤ ខែមករា ឆ្នាំ១៩៩៦ និងអនុក្រិតលេខ១១៣ អនក្រ ចុះថ្ងៃទី២៧ ខែសីហា ឆ្នាំ២០១៥ ស្តីពី(ការគ្រប់គ្រង សំរាមសំណល់រឹងទីប្រជុំជន) រដ្ឋបាលស្រុកសម្រេចដាក់ចេញ នូវសេចក្តីណែនាំចាប់ពីពេលនេះតទៅ ដល់គ្រប់ម្ចាស់លំនៅឋាន ទីតាំងអាជីកម្ម សេវាកម្ម ភោជនីយដ្ឋាន ទីផ្សារ ទីកន្លែងកម្សាន្ត ម្ចាស់ប្រភពបង្កើតសំណល់នានា និងប្រជាពលរដ្ឋ ត្រូវចូលរួម អនុវត្តន៍តួនាទី និងភារកិច្ច តាមការណែនាំ របស់អាជ្ញាធរ ក្នុងការវិចខ្ចប់ ទុកដាក់សំរាមឲ្យបានត្រឹមត្រូវ៕ ដោយ៖ ដែន សីមា
