ភ្នំពេញ ៖ កម្លាំងសន្តិសុខផ្ទៃក្នុង និងកម្លាំងនាយកដ្ឋានប្រឆាំងបទល្មើសបច្ចេកវិទ្យា សហការ កម្លាំងប៉ុស្តិ៍នគរបាលរដ្ឋបាលស្រះចក ចុះបង្ក្រាបទីតាំងភ្នាល់បាល់ ដែលមានទីតាំង ផ្ទះលេខ១៤ ផ្លូវ៤៧ ភូមិ៨ សង្កាត់ស្រះចក ខណ្ឌដូនពេញ រាជធានីភ្នំពេញ ឃាត់ខ្លួនជនសង្ស័យ និងដកហូតសម្ភារ ម៉ូតូ កុំព្យូទ័រជាច្រើនគ្រឿង ។
លោកវរសេនីយ៍ឯក ទៀង ច័ន្ទសារ បានឲ្យដឹងថា កាលពីថ្ងៃទី២ ខែសីហា ឆ្នាំ២០១៩ វេលាម៉ោង១៨ កម្លាំងប៉ុស្តិ៍នគរបាលរដ្ឋបាលស្រះចក កម្លាំងអធិការដ្ឋាននគរបាលខណ្ឌដូនពេញ និងកម្លាំងសន្តិសុខផ្ទៃក្នុងរបស់ស្នងការដ្ឋាននគរបាលរាជធានីភ្នំពេញ បានសហការជាមួយកម្លាំងនាយកដ្ឋានប្រឆាំងបទល្មើសបច្ចេកវិទ្យារបស់អគ្គស្នងការដ្ឋាននគរបាលជាតិ ដោយបានការអនុញ្ញាតពីលោក គុជ គីមឡុង ព្រះរាជអាជ្ញារង និងបានធ្វើកំណត់ហេតុឆែកឆេរដោយលោកវរសេនីយ៍ទោ ឡេង ចាន់ថន នាយការិយាល័យស្តីទី ជាមន្ត្រីនគរបាលយុត្តិធម៌ ដែលមានសមាសភាពចូលរួម លោក ឧត្តមសេនីយ៍ទោ ប៊ុន សុសិក្ខា ស្នងការរង និង លោក ឧត្តមសេនីយ៍ទោ ស៊ីវ ឈាន់ អនុប្រធាននាយកដ្ឋាន បានដឹកនាំក្រុមប្រតិបត្តិការចម្រុះចុះទៅដល់ទីតាំង ផ្ទះលេខ១៤ ផ្លូវ៤៧ ភូមិ៨ សង្កាត់ស្រះចក ខណ្ឌដូនពេញ រាជធានីភ្នំពេញ ដែលមានម្ចាស់ឈ្មោះ នាក់ គន្ធា ភេទប្រុស អាយុ២៣ឆ្នាំ ជនជាតិខ្មែរ បានធ្វើការឆែកឆេរត្រួតពិនិត្យរកឃើញ ៖ ប្រាក់មួយចំនួន ទូរស័ព្ទ (អ្នកលេង) ចំនួន ២១ គ្រឿង ទូរស័ព្ទ ភ្នាក់ងារ ចំនួន ១៣ គ្រឿង បញ្ជីនិងបុងភ្នាល់បាល់ មួយចំនួន លិខិតអនុញ្ញាត ចំនួន ០២ ច្បាប់ កុំព្យូរទ័រលើតុ ចំនួន ២៦ គ្រឿង CPU កុំព្យូរទ័រ ចំនួន ២៦ គ្រឿង ម៉ាស៊ីនព្រីន ចំនួន ១ គ្រឿង ទូរទស្សន៍ ចំនួន ៤ គ្រឿង ឃាត់មនុស្ស មួយចំនួន ម៉ូតូ ចំនួន ៣០ គ្រឿង (បញ្ជាក់ ម៉ូតូ ចំនួន ២៩ គ្រឿង ផ្ញើទុកនៅអធិការដ្ឋាននគរបាលខណ្ឌដូនពេញ)។
បច្ចុប្បន្នវត្ថុតាង និងជនសង្ស័យខាងលើ សមត្ថកិច្ចចម្រុះសម្រេចដកហូត និងយកទៅនាយកដ្ឋានប្រឆាំងបទល្មើលបច្ចេកវិទ្យា ដើម្បីធ្វើការស្រាវជ្រាវបន្ត៕ ដោយ៖បញ្ញាស័ក្តិ