បាត់ដំបង៖ ស្ត្រីវ័យកណ្តាលម្នាក់ទំនងខូចចិត្តដោយសារប្តីរត់ចោលសម្រេចចិត្តចងកសម្លាប់ខ្លួនឯងស្លាប់នៅលើផ្ទះ ហើយសាកសពឡើងរលួយស្អុយ ទើបបង្កការភ្ញាក់ផ្អើលដល់សាច់ញាតិ។
នៅព្រឹកថ្ងៃទី៣ ខែសីហា ឆ្នាំ២០១៩នេះ ប្រជាពលរដ្ឋបានប្រទះឃើញសាកសពស្ត្រីវ័យកណ្តាលម្នាក់ បានចងកខ្លួនឯងស្លាប់នៅលើផ្ទះ ត្រង់ចំណុចក្រមទី៦ ភូមិដូនញ៉ែម ឃុំល្វា ស្រុកបវេល ខេត្តបាត់ដំបង។
សាក្សីនៅកន្លែងកើតហេតុនិយាយថា ជនរងគ្រោះ កន្លងមកតែងតែព្យាយាមរត់ទៅចងក ដើម្បីបញ្ចប់ជីវិតខ្លួនឯង ដោយស្រែកទ្រហោយំថាខ្លួនបានខូចចិត្ត ព្រោះតែ ប្តីបោះបង់ចោល ប៉ុន្តែរាល់ការប៉ុនប៉ងត្រូវបានអ្នកស្រុកជួយទាន់គ្រប់ពេលវេលា។
សមត្ថកិច្ចបំភ្លឺបន្ថែមថា ជនរងគ្រោះមានឈ្មោះមាស គឹមសួន អាយុ៥៦ឆ្នាំ រស់នៅភូមិ ឃុំកន្លែងកើតហេតុខាងលើ ។ ជនរងគ្រោះស្លាប់ ដោយបានយកកន្សែងចងករបស់ខ្លួនភ្ជាប់ទៅនឹងធ្នឹមផ្ទះ។ យោងតាមសភាពសាកសពរបស់ជនរងគ្រោះ បង្ហាញថា បានស្លាប់រយៈពេល៣ទៅ៤យប់កន្លងមកហើយ ហើយអ្នកភូមិមិនបានដឹងព្រោះតែផ្ទះនៅឆ្ងាយដាច់ៗពីគ្នា៕ ដោយ៖បញ្ញាស័ក្តិ