តាកែវ៖ លោក ភួង ឈីម អភិបាលស្រុកបាទី បានដឹកនាំកម្លាំងចម្រុះ ឆ្មក់ចុះពិនិត្យទីតាំរណ្តៅដីគ្មានច្បាប់មួយកន្លែង ស្ថិតនៅភូមិឱភាសាំង ឃុំកណ្តឹង ស្រុកបាទី កាលរសៀលថ្ងៃទី២ ខែសីហា ឆ្នាំ២០១៩ ដោយធ្វើការឃាត់រថយន្ត និងគ្រឿងចក្រ បានចំនួន ២គ្រឿង យកមករក្សាទុក ខណៈដែលម្ចាស់ទីតាំង នឹងត្រូវប្រឈមមុខទៅនឹងផ្លូវច្បាប់ ។
លោកអភិបាលស្រុកបាទី បានឲ្យដឹងថា ករណីដែលឈ្មួញលួចកាយដីលក់នៅក្នុងភូមិសាស្ត្រ ព្រៃភ្នំតាម៉ៅនេះ បើតាមការពិនិត្យជាក់ស្តែង តាមរណ្តៅដី មានទំហំធំ និងជ្រៅតាមកន្លែង ដែលអាចសន្និដ្ឋានថា សកម្មភាពជីកយកអាចម៍ដីលក់នេះ គឺមានរយៈពេលជិត ១ខែមកហើយ ។ លោកបន្តថា ក្នុងការចុះពិនិត្យរណ្តៅដីគ្មានច្បាប់នេះ គឺយើងបានឃាត់រថយន្តដឹកដី ១គ្រឿង និងគ្រឿងចក្រ អេស្ការវ៉ាទ័រ ១គ្រឿង យកមករក្សាទុកនៅប៉ុស្តិ៍រដ្ឋបាល ចំណែកម្ចាស់ទីតាំងឈ្មោះប៊ុន ធឿន រតនា លោកបានធ្វើកំណត់ហេតុ និងបញ្ជូនសំណុំរឿងបន្តទៅជំនាញ ដើម្បីចាត់ការតាមនីតិវិធី ។
បើតាមការឲ្យដឹងពីលោក ខាន់ សុខា អភិបាលរងខេត្តតាកែវ បានប្រាប់ឲ្យដឹងថា ចំពោះការជីករណ្តៅដី ដែលគ្មានច្បាប់នេះ គឺលោកនឹងអនុវត្តន៍តាមនីតិវិធី ដោយមិនមានកាយោគយល់ឡើយ ចំពោះអ្នកប្រព្រឹត្តបទល្មើសនេះ និងបញ្ជាឲ្យអាជ្ញាធរចុះចាប់រថយន្ត និងគ្រឿងចក្រដែលធ្វើសកម្មភាពនោះយកមករក្សាទុកទាំងអស់។ លោកបានសង្កត់ធ្ងន់ថា បើមាន ១ ចាប់១ មាន២ ចាប់២ បើសិនជាដឹងថាគ្មានច្បាប់ ហើយការងារនេះ អាជ្ញាធរគ្រប់ស្រុកទាំងអស់បាននិងកំពុងចុះពិនិត្យ ចំពោះការជីកកកាយយករ៉ែ ធម្មជាតិ អាចម៍ដី ដីភ្នំ ដែលគ្មានច្បាប់ទាំងនោះ៕ដោយ៖ តាកែវ