ភ្នំពេញ៖ អធិការដ្ឋាននគរបាលខណ្ឌទួលគោក បដិសេធចំពោះព័ត៌មានមួយចំនួន ដែលបានបង្ហោះក្នុងបណ្តាញសង្គមហ្វេសប៊ុករិះគន់ លើអធិការដ្ឋាននគរបាលខណ្ឌទួលគោក ដែលមានភាពអសកម្មក្នុងការបង្ក្រាបបទល្មើសលួចម៉ូតូ។
នៅរសៀលថ្ងៃទី៣ ខែសីហា ឆ្នាំ២០១៩ ក្នុងនាមអធិការដ្ឋាននគរបាលខណ្ឌទួលគោក សូមបកស្រាយបំភ្លឺក្រោយពីបានទទួលពាក្យបណ្តឹងរបស់ជនរងគ្រោះ កម្លាំងសមត្ថកិច្ចនគរបាលខណ្ឌទួលគោក បានស្រាវជ្រាវរហូតឈានដល់បង្ក្រាបបាន និងឃាត់ខ្លួនជនសង្ស័យដែលលួចសកម្មក្នុងរាជធានីភ្នំពេញ (លួចម៉ូតូ) ចំនួនសរុប៤នាក់ (ស្រី២នាក់) នៅចំណុចផ្ទះសំណាក់នគរជុំ ក្នុងសង្កាត់ផ្សារដើមគរ ខណ្ឌទួលគោក នាថ្ងៃទី១ ខែសីហា ឆ្នាំ២០១៩ វេលាម៉ោង១១និង៤០នាទី ។
ដកហូតបានម៉ូតូចំនួន០២គ្រឿង និងបានប្រគល់ជូនទៅជនរងគ្រោះវិញ។ ចំណែកម៉ូតូដែលនៅសល់ចំនួន០៣គ្រឿង កំពុងរក្សាទុកបណ្តោះអាសន្ននៅអធិការដ្ឋាននគរបាលខណ្ឌទួលគោក ដើម្បីស្រាវជ្រាវបន្ត និងប្រកាសស្វែងរកម្ចាស់។
ក្នុងនោះលទ្ធផលដែលបានបង្ក្រាបក្នុងរយៈពេល៣ថ្ងៃ ដែលគិតចាប់ពីថ្ងៃទី១ ដល់ថ្ងៃទី៣ ខែសីហា ឆ្នាំ២០១៩ គឺបទល្មើសលួច ៤ករណី
បទល្មើសកាន់កាប់អាវុធដោយគ្មានការអនុញ្ញាត ១ករណី និងបទល្មើសប្រើប្រាស់ដោយខុសច្បាប់នូវសារធាតុញៀន ១ករណី។ ឃាត់ខ្លួនជនសង្ស័យសរុបចំនួន ៩នាក់ (ស្រី២នាក់)។
សូមបញ្ជាក់ថា បណ្ដាញសង្គម facebook នៅក្នុងពេលថ្មីៗនេះ បានផ្សាយថា អធិការវ័យក្មេងខណ្ឌទួលគោក កំពុងរងការរិះគន់ថា អសកម្មក្នុងការដឹកនាំកម្លាំងការពារសន្តិសុខជូនពលរដ្ឋ ដោយមួយរយៈថ្មីៗនេះ គេសង្កេតឃើញថា ករណីចោរកម្ម លួច ឆក់ បានកើតឡើងជាញឹកញាប់ ក្នុងភូមិសាស្ត្រខណ្ឌទួលគោក ហើយមិនត្រូវបានសមត្ថកិច្ចបង្ក្រាបក្រុមចោរទាំងនោះបានទេ។
លោកវិល្លាម សមាជិកក្រុមប្រឹក្សា និងទីក្រុងយោបល់ មកពីគណបក្សខ្មែរក្រោក នៅថ្ងៃទី 3 ខែសីហានេះ បានសរសេរលើហ្វេសប៊ុកផ្លូវការរបស់លោកថា ” អធិការវ័យក្មេងខណ្ឌទួលគោក កំពុងរងការរិះគន់ថា អសកម្មក្នុងការដឹកនាំកម្លាំងការពារសន្តិសុខជូនពលរដ្ឋ ដោយមួយរយៈថ្មីៗនេះ គេសង្កេតឃើញថា ករណីចោរកម្ម លួច ឆក់ បានកើតឡើងជាញឹកញាប់ ក្នុងភូមិសាស្ត្រខណ្ឌទួលគោក ហើយមិនត្រូវបានសមត្ថកិច្ចបង្ក្រាបក្រុមចោរទាំងនោះបានទេ ដោយទុកបណ្តោយឲ្យពួកគេបង្កការលួច ឆក់ ជាហូរហែ ព្រោះតែលោកវរសេនីយ៍ទោ សុខ ហេង អធិការនគរបាលខណ្ឌទួលគោកវ័យក្មេងរូបនេះ គិតតែសម្ងំនៅក្នុងបន្ទប់ការិយាល័យ ខុសពីលោកអធិការមុនៗ ដែលតែងតែដឹកនាំកម្លាំងចុះល្បាត ដើម្បីការពារសុវត្ថិភាព ជូនពលរដ្ឋក្នុងមូលដ្ឋានរបស់ខ្លួន ។ ចុះហេតុអ្វីបានជាលោកអធិការថ្មីនេះ កម្រឃើញដឹកនាំកម្លាំងការពារសន្តិសុខ ជូនប្រជាពលរដ្ឋម៉្លេះ?”៕ ដោយ៖កូឡាប