ភ្នំពេញ ៖ យុវជន៤នាក់ បានជិះម៉ូតូពីរគ្រឿង ប្រដេញគ្នាតាមផ្លូវងងឹកក្នុងល្បឿនលឿន ដោយខ្វះការប្រុងប្រយ័ត្នបានជ្រុលទៅបុកថ្មដែលគេដាក់ចោលសម្រាប់ធ្វើសួនច្បារចែកទ្រូងផ្លូវ បណ្ដាលឲ្យយុវជនម្នាក់បោកក្បាលស្លាប់ភ្លាមៗនៅនិងកន្លែង និងបីនាក់ទៀតរងរបួសធ្ងន់ពីរស្រាល ។
ហេតុការណ៍គ្រោះថ្នាក់ចរាចរណ៍ដ៍រន្ធត់ខាងលើនេះ បានកើតឡើងនៅវេលាម៉ោង១០និង៣០នាទីយប់ថ្ងៃទី២ ខែមករាឆ្នាំ២០១៨ ស្ថិតនៅតាមកំណាត់ផ្លូវ២១៧ ត្រង់ចំណុចស្ពានបាគូរ ក្នុងភូមិព្រែកជ្រៃសង្កាត់ស្ពានថ្ម ខណ្ឌដង្កោ រាជធានីភ្នំពេញ។
សមត្ថកិច្ចបានប្រាប់ឲ្យដឹងថា ជនរងគ្រោះដែលស្លាប់បាត់បង់ជីវិតមានឈ្មោះម៉ុត ធួន អាយុ២១ឆ្នាំ មុខរបធ្វើស្រែ ស្នាក់នៅភូមិដើមលក ឃុំរវៀង ស្រុកសំរោង ខេត្តតាកែវ ។ចំណែកជនរងគ្រោះរបួសធ្ងន់២នាក់ របួសស្រាលម្នាក់ មិនស្គាល់អត្តសញ្ញាណនោះទេ ។
យោងតាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញយុវជនបួននាក់ជិះម៉ូតូពីរគ្រឿងម៉ាកMSX ដោយមួយគ្រឿងមិនមានស្លាកលេខ ជិះគ្នាពីរនាក់ មានជនរងគ្រោះស្លាប់បាត់បង់ជីវិត និងមួយគ្រឿងទៀតពាក់ស្លាកលេខ តាកែវ 1J.5019 ជិះឌុបគ្នាពីរនាក់ បានធ្វើដំណើតាមបណ្ដោយផ្លូវ២១៧ ទិសដៅពីជើងទៅត្បូង ក្នុងល្បឿនលឿន ដោយពួកគាត់ប្រដេញគ្នាទាំងស្ថានភាពផ្លូវងងឹត ខណៈមកដល់ចំណុចកើតហេតុខាងលើ ស្រាប់តែម៉ូតូមិនមានស្លាកលេខបានជ្រុលទៅបុកថ្មដែលគេដាក់លើថ្នល់ទុកចោលដើម្បីរៀបចំធ្វើសួនច្បារចែកផ្លូវនោះ បណ្ដាលឲ្យជនរងគ្រោះដួលបោកនិងថ្នល់ស្លាប់ម្នាក់ភ្លាមៗនៅនិងកន្លែង និងម៉ូតូមួយគ្រឿងមកបុកពីលើថែមទៀតបណ្ដាលរងរបួសធ្ងន់ស្រាលទាំងបីនាក់។
ក្រោយកើតហេតុ ជនរងគ្រោះរងរបួសធ្ងន់ពីរនាក់ ត្រូវបានរថយន្តសង្គ្រោះបន្ទាន់ ដឹកយកទៅសង្គ្រោះនៅឯមន្ទីពេទ្យភ្លាមៗ ។ បន្ទាប់មក សមត្ថកិច្ចមូលដ្ឋានខណ្ឌដង្កោ បានចុះមកដល់កន្លែងកើតហេតុធ្វើការវាស់វែងក៍ដូចជាធ្វើកំណត់ហេតុទៅលើសពជនរងគ្រោះ រួចក៏ប្រគល់សពនិងម៉ូតូទាំងពីរគ្រឿងអោយក្រុមគ្រួសារយកទៅស្រុកកំណើត៕ ដោយ៖បញ្ញាស័ក្តិ
