ខេត្តឧត្តរមានជ័យ៖មន្ត្រីដែលមហាជនស្គាល់ច្បាស់ជានាយរងខណ្ឌរដ្ឋបាលព្រៃឈើខេត្តឧត្តរមានជ័យ បានបង្ហោះសំណេរតាមរយៈបណ្តាញសង្គមផ្ទាល់ខ្លួនថា រលាយអស់ហើយ ខ្មាស់ណាស់លោកអើយ ការពារមិនបាន ធ្វើម្តេចយើងតូច ឆន្ទៈយើងមាន ឱកាសយើងគ្មាន បានត្រឹមសោកស្តាយ។
លោក ឡឹក សុជាតា នាយរងខណ្ឌរដ្ឋបាលព្រៃឈើខេត្តឧត្តរមានជ័យ មានការបង្ហោះសំណេរក្នុងបណ្តាញសង្គមបែបនេះ ខណៈដីព្រៃរដ្ឋរក្សាទុកចំនួន៥០០ហិកតាសម្រាប់ដាំស្តារព្រៃឈើឡើងវិញ សុទ្ធតែអ្នកធំឆូសឆាយហ៊ុមព័ទ្ធយកអស់។ ស្ថិតនៅភូមិទួលស្វាយ ឃុំត្រពាំតាវ ស្រុកអន្លង់វែង ។
សំណេរលោកបញ្ជាក់ថា ដីព្រៃស្តារព្រៃឡើងវិញក្នុងដីកាលេខ៧៩ទំហំចំំំនួន៥០០ហិកតា ពុទ្ធោអរហំ ដីធំជាងវាំង គេយកបាត់អស់ ស្មានតែពលរដ្ឋគឺពួកហ្នឹងសោះ ឈួសឆាយកាប់គាស់ ចែកគ្នាតាមចិត្ត មានប៉ុណ្ណឹងហើយ ឱម្ចាស់ថ្លៃអើយ ចង់បានអ្វីម្លេះ ដីព្រៃគេទុករដ្ឋថែរក្សា ប្រាំរយហិកតា ស្តារព្រៃឡើងវិញ សុទ្ធតែលោកធំ ឈួសឆាយព័ទ្ធឃ្លុំលើដីដីកា លេខ៧៩ ចេញដោយសាលា គ្រប់គ្នាស្គាល់ថា ខេត្តឧត្ដរមានជ័យ និងមិនចេះតិចដង បានប្រារព្ធបុណ្យរុក្ខទិវាដល់ទៅបីដងរួចមកហើយ ចំណាយវាល់លាន វេទនាគ្រប់គ្នា ទោះក្តៅរងា មេព្រៃជាយដែន។
រំលឹកថា មន្ត្រីខណ្ឌរដ្ឋបាលព្រៃឈើខេត្តរូបនេះ នៅថ្ងៃទី២ ខែសីហា ឆ្នាំ២០១៨ នាយខណ្ឌរដ្ឋបាលព្រៃឈើខេត្តបានបែងចែកភារកិច្ចទទួលខុសត្រូវនិងរបៀបធ្វើការងារ លើលោកឡឹក សុជាតា រូបនេះស្ទើរអស់កិច្ចការទៅហើយ រួមមាន ផ្នែករដ្ឋបាល បុគ្គលិក ផែនការនិងសហប្រតិបត្តិការអង្គការជាតិ អន្តរជាតិ ការអភិវឌ្ឍសមត្ថភាព និងបណ្តុះបណ្តាលធនធានមនុស្ស ការកំណត់ព្រំប្រទល់ដីព្រៃឈើ ការចាត់ថ្នាក់និងការចុះបញ្ជីការ ការងារព្រៃឈើ ការងារសម្របសម្រួលសគមន៍ព្រៃឈើ និងកម្មវិធីREED(ឥណទានកាបោន) ការគ្រប់គ្រងបច្ចេកទេសកែច្នៃឈើ ផលអនុផលព្រៃឈើ ការងារផ្សព្វផ្សាយ និងគ្រប់គ្រងតំបន់ផ្នែករដ្ឋបាលព្រៃឈើផ្តាច់មុខភូមិសាស្ត្រស្រុកបន្ទាយអំពិលផងដែរ៕ដោយ៖បញ្ញាស័ក្តិ