ខេត្តព្រះសីហនុ៖ ប្រធានមន្ទីរអប់រំយុវជន និងកីឡា ខេត្តព្រះសីហនុ លោក កែវ ឡាយ បានបំភ្លឺថា មុនមានការលក់ ឬដោះដូរទីតាំងផ្ទះសំណាក់គ្រូបង្រៀន នៅខេត្តព្រះសីហនុ ដូចពាក្យចចាមអារ៉ាម ដែលគេនិយាយតៗគ្នានោះទេ។
លោក កែវ ឡាយ បានបដិសេធន៍ដូច្នេះធ្វើឡើង នៅក្នុងកិច្ចប្រជុំបន្ទាន់មួយ កាលពីថ្ងៃទី៣ ខែសីហា ឆ្នាំ២០១៩ នាមន្ទីរអប់រំខេត្តព្រះសីហនុ។
លោកថា កិច្ចប្រជុំនេះ ធ្វើឡើងដើម្បីពិភាក្សាដោះស្រាយ ទៅលើមន្ទឹលសង្ស័យ ឬពាក្យចចាមអារ៉ាមដែលថា មានករណីលក់ ឬដោះដូរទីតាំផ្ទះសំណាក់គ្រូបង្រៀននៅខេត្តព្រះសីហនុ ខណៈតម្លៃហាងឆេងដីនៅខេត្តព្រះសីហនុ កើនខ្ពស់កប់ពពកនោះ។
លោក កែវ ឡាយ ឲ្យដឹងដូច្នេះ រួចបញ្ជាក់ថា សមាសភាពមន្ត្រីចូលរួមប្រជុំលើបញ្ហាកើតមាន នៅផ្ទះសំណាក់គ្រូបង្រៀន មានទីតាំងស្ថិតនៅក្នុងសង្កាត់លេខ៣ ក្រុងព្រះសីហនុ រួមមាន៖
១~ គណៈកម្មាធិការកណ្ដាលសមាគមបុគ្គលិកសិក្សាខ្មែរ(សបសខ)
២~ គណៈកម្មាធិការ សបសខ ខេត្តព្រះសីហនុ
៣~ ថ្នាក់ដឹកនាំមន្ទីរអប់រំ យុវជននិងកីឡាខេត្តព្រះសីហនុ
លោក កែវ ឡាយ បន្តថា កិច្ចប្រជុំនោះ គណៈកម្មាធិការកណ្តាល, ខេត្ត និងថ្នាក់ដឹកនាំមន្ទីរ បានពិភាក្សាលើបញ្ហាពាក្យចចាមអារាមស្តីពីការដោះដូរ លក់ និងជួលផ្ទះសំណាក់គ្រូបង្រៀន នៅខេត្តព្រះសីហនុ។ ក្នុងនោះគណៈកម្មាធិការ និងថ្នាក់ដឹកនាំមន្ទីរបានឯកភាព៖
១~ រក្សាផ្ទះសំណាក់គ្រូបង្រៀននៅខេត្តព្រះសីហនុ មិនលក់ មិនជួល និងមិនប្តូរទីតាំង
២~ ជួសជុល និងកែលម្អជាបន្ទាន់ឡើងវិញទាំងស្រុង ដោយប្រើប្រាស់ថវិកាគណៈកម្មាធិការកណ្ដាល សបសខ និងការជួយឧបត្ថម្ភគាំទ្រ ដែលទទួលបាន ពីសប្បុរសជននានា៕ ដោយ៖ ដែន សីមា
