ខេត្តព្រះសីហនុ៖ អាជ្ញាធរស្រុកកំពង់សិលា ខេត្តព្រះសីហនុ បានឲ្យដឹងថា គិតត្រឹមម៉ោង ៩យប់ ថ្ងៃទី៤ ខែសីហា ឆ្នាំ២០១៩ កម្ពស់ទឹក នៅស្ពានស្ទឹងសំរោង PK116 តាមផ្លូវជាតិលេខ៤ ស្ថិតនៅភូមិ ស្ទឹងសំរោង ឃុំអូរបាក់រទេះ ស្រុកកំពង់សិលា កម្ពស់ទឹកបានឡើង រហូតដល់ ៤.១០ម៉ែត្រ។ ពោលគឺនៅសល់ ០.៩០ម៉ែត្រទៀតទេ កម្ពស់ទឹក នឹងឈានដល់ប្រកាស់អាសន្ន ។
ភ្លៀងមិនព្រមរាំង បណ្តាលឲ្យលិចផ្លូវ និងផ្ទះពលរដ្ឋ ស្ទើរមួយចំហៀង ក្រុងព្រះសីហនុកាលពីយប់មិញនេះ!
ខេត្តព្រះសីហនុ៖ ភ្លៀងបានបន្តធ្លាក់ខ្លាំងមកជាបន្តបន្ទាប់ នាទីប្រជុំជនក្រុងព្រះសីហនុ បណ្តាលឲ្យលិចផ្លូវ និងផ្ទះសម្បែង របស់ប្រជាពលរដ្ឋមួយចំនួន នាតំបន់ទំនាប។
គិតមកដល់ព្រឹកនេះ ភ្លៀងនៅតែបន្តធ្លាក់មកខ្លាំង គឺចាប់តាំងពីថ្ងៃទី៣ ខែសីហា បន្តមកដល់ព្រឹកថ្ងៃទី៥ ខែសីហា ឆ្នាំ២០១៩នេះ។
ភ្លៀងធ្លាក់មិនព្រមរាំងនេះ បានបណ្តាលឲ្យតំបន់ទំនាបមួយចំនួន នាទីប្រជុំជនក្រុងព្រះសីហនុ ត្រូវលិច ដោយជំនន់ទឹកភ្លៀង ហើយផ្លូវធ្វើដំណើរមួយចំនួនមិនអាចធ្វើដំណើរឆ្លងកាត់បានទេ។
ត្រង់ចំណុចនេះ ប្រជាពលរដ្ឋរស់នៅក្រុងព្រះសីហនុ បានឲ្យដឹងថា បច្ចុប្បន្នភាព ក្រុងទេសចរណ៍មួយនេះ ទន្ទឹមគ្នាមានការអភិវឌ្ឍន៍ លើវិស័យសំណង់យ៉ាងគំហុក ប៉ុន្តែមូលដ្ឋាននេះ ក៏បានធ្វើឲ្យប៉ះពាល់ដល់ការរស់នៅ របស់ប្រជាពលរដ្ឋច្រើនដែរ។ ពោលគឺ ក្រៅពីក្រុងទេសចរណ៍មួយនេះ មានគំនរសំរាមត្រូវគេគរទុកចោលជះក្លិនស្អុយដូចលាមក៌ ឬស្អុយដូចអាចម៍នោះ គឺបញ្ហាប្រឈមមួយទៀតដែល លោក គួច ចំរើន អភិបាល នៃគណៈអភិបាលខេត្តព្រះសីហនុ មិនទាន់អាចដោះស្រាយជូនពលរដ្ឋបាន គឺបញ្ហាចរាចរណ៍កកស្ទះ, ផ្លូវថ្នល់ខូច, ស្ទះប្រព័ន្ធលូបង្ហូរទឹក ឬ អូរ ប្រឡាយ សម្រាប់រំដោះទឹក និងជំនន់ទឹកភ្លៀងលិចលំនៅដ្ឋាន របស់ប្រជាពលរដ្ឋ និងទឹកលិចផ្លូវធ្វើដំណើរជាដើម..៕ ដោយ៖ ដែន សីមា
