កងកម្លាំងបដិវត្តន៍អ៊ីស្លាម របស់ប្រទេសអ៊ីរ៉ង បានចាប់កប៉ាល់មួយគ្រឿងរបស់អ៊ីរ៉ាក់ ដែលបានដឹកប្រេងរត់ពន្ធ នៅក្នុងឈូងសមុទ្រ។ នេះបើតាមការចុះផ្សាយរបស់ភ្នាក់ងារសារព័ត៌មាន IRNA កាលពីថ្ងៃអាទិត្យម្សិលមិញនេះ។
បើការចុះផ្សាយបានឲ្យដឹងថា កប៉ាល់ដែលអ៊ីរ៉ងរឹបអូសនោះ មានដឹកប្រេងគេចពន្ធចំនួន ១០០.០០០លីត្រ ទៅអោយអារ៉ាប់ជិតខាង។ កប៉ាល់នោះជាកម្មសិទ្ធិរបស់អ៊ីរ៉ាក់។
មនុស្សចំនួន ៧នាក់នៅលើកប៉ាល់នោះ ត្រូវបានឃុំខ្លួន ខណៈដែលកប៉ាល់ដឹកប្រេងនោះ ត្រូវបានកងកម្លាំងអ៊ីរ៉ងបញ្ជូនទៅកំពង់ផែ Bushehr ភាគខាងត្បូង។ នេះបើតាមការបញ្ជាក់របស់មេបញ្ជាការនៃកងកម្លាំងបដិវត្តន៍អ៊ីស្លាមអ៊ីរ៉ង។
កងកម្លាំងបដិវត្តន៍អ៊ីស្លាមអ៊ីរ៉ង បានប្រកាសថា ខ្លួននឹងមិនស្ទាក់ស្ទើរនោះឡើយ ក្នុងការការពារផលប្រយោជន៍របស់ប្រទេសខ្លួននៅតំបន់ឈូងសមុទ្រ។
សូមបញ្ជាក់ថា កាលពីថ្ងៃទី ១៤ ខែកក្កដា កន្លងទៅ កងកម្លាំងអ៊ីរ៉ងក៏បានចាប់កប៉ាល់ដឹកប្រេងខុសច្បាប់ ដែលមានដោតទង់ជាតិប្រទេសប៉ាណាម៉ា។ កប៉ាល់នោះបានដឹកប្រេងគេចពន្ធចំនួន ១លានលីត្រ។
ចំណែកនៅថ្ងៃទី ១៩ ខែមិថុនា អ៊ីរ៉ងចាប់បានកប៉ាល់ដឹកប្រេងរបស់អង់គ្លេស ដែលបានធ្វើដំណើរកាត់ច្រកសមុទ្រ Hormuz ដែលអ៊ីរ៉ងអះអាងថា ជាការរំលោភច្បាប់ដែនទឹកអន្តរជាតិរបស់អ៊ីរ៉ង៕
អត្ថបទប្រែសម្រួលដោ៖ សុភ័ក្រ
ប្រភព៖ Xinhua
