ជើងយន្តហោះចំនួនជាង ២០០ត្រូវបានលុបចោលនៅព្រលានយន្តហោះអន្តរជាតិហុងកុង (HKIA) នៅថ្ងៃចន្ទនេះ ខណៈដែលក្រុមបាតុករនៅក្នុងក្រុងបានឆាឆៅទៅដល់សេវាកម្មដឹកជញ្ជូនតាមអាកាស។
ជើងយន្តហោះនៅព្រលានទីក្រុង ដែលជាព្រលានមានការមមាញឹកបំផុត ក្នុងចំណោមព្រលានផ្សេងទៀតក្នុងពិភពលោក ត្រូវបានលុបចោលនៅពេលព្រឹកថ្ងៃនេះ ក្រោយពេលអាជ្ញាធរអាកាសចរបានប្រាប់អ្នកដំណើរឲ្យដឹងពីការបង្អាក់។
នៅក្នុងសេចក្តីប្រកាស អាជ្ញាធរអាកាសចរបានណែនាំ ឲ្យអ្នកដំណើរទាំងអស់ ឲ្យធ្វើការត្រួតពិនិត្យព័ត៌មាន នៃជើងហោះហើរចុងក្រោយរបស់ពួកគេ និងចាត់ចែងមកកាន់ព្រលានយន្តហោះ ក្នុងករណីពេលដែលកៅអី និងពេលហោះហើររបស់ពួកត្រូវបានបញ្ជាក់។
ព្រលានក៏បានណែនាំឲ្យអ្នកធ្វើដំណើរទាំងអស់ធ្វើការឆែកមើល នៅលើវេបសាយរបស់ខ្លួន អំពីព័ត៌មាននៃការហោះហើរ។
សូមបញ្ជាក់ថា ទីក្រុងហុងកុងបច្ចុប្បន្ន កំពុងត្រូវញាំញីដោយវិបត្តិនយោបាយអស់រយៈពេលជាង ២ខែមកហើយ ខណៈដែលក្រុមអ្នកតវ៉ាដ៏ច្រើនមិនធ្លាប់មានក្នុងប្រវត្តិសាស្រ្ត បានបន្តធ្វើការទាមទារប្រឆាំងទៅនឹងច្បាប់ធ្វើបត្យាប័ន ដែលច្បាប់នេះនឹងអនុញ្ញាត ឲ្យមានការបញ្ជូនអ្នកទោសពីហុងកុង ទៅកាត់ទោសនៅប្រទេសចិនបាន បើវាចូលជាធរមាន។
ច្បាប់ធ្វើបត្យាប័ននោះ ត្រូវបានមេដឹកនាំហុងកុងប្រកាសព្យួរ ក្រោយមានការផ្ទុះការតវ៉ាខ្លាំង រហូតដល់មានការប៉ះទង្គិចគ្នា។
ទីក្រុងហុងកុង គឺជាអតីតដែនដីស្ថិតក្រោមអាណានិគមរបស់អង់គ្លេស។ ក្រុងនេះ ត្រូវបានអស់គ្លេសប្រគល់ទៅឲ្យប្រទេសចិនវិញ ក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ និងធានាឲ្យមានសេរីភាពនៃការបញ្ចេញមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia