ទីក្រុងវ៉ាស៊ីនតោន និងសេអ៊ូល នឹងចាប់ផ្តើមធ្វើសមយុទ្ធយោធារួមគ្នានៅថ្ងៃចន្ទនេះ ទោះបីជាកូរ៉េខាងជើងបានធ្វើការព្រមានថា សមយុទ្ធនោះអាចនឹងប៉ះពាល់ទៅដល់ការចរចារឿង នុយក្លេអ៊ែរ រវាងអាមេរិច និងកូរ៉េខាងជើង។
ការផ្តើមសមយុទ្ធរួមគ្នា រវាងសម្ព័ន្ធមិត្តចាក់ទឹកមិនលិចទាំង ២ កើតឡើង ក្រោយពេលក្រុងព្យុងយ៉ាង បានធ្វើការបាញ់សាកល្បងមីស៊ីលចំនួន ៣លើកតែត្រឹមក្នុងរយៈពេល ៨ថ្ងៃប៉ុណ្ណោះ។
កូរ៉េខាងជើងបាននិយាយថា ការបាញ់សាកល្បងអាវុធរបស់ខ្លួន គឺដើម្បីផ្ញើសារព្រមានទៅដល់កូរ៉េខាងត្បូង។
អ្នកវិភាគ បាននិយាយថា សមយុទ្ធយោធារួមគ្នារវាងអាមេរិច និងកូរ៉េខាងត្បូង អាចនឹងធ្វើឲ្យមានការពន្យារពេលចំពោះកិច្ចចរចានុយក្លេអ៊ែរជាមួយនឹងកូរ៉េខាងជើង។
កិច្ចចរចារកម្មវិធីនុយក្លេអ៊ែររបស់កូរ៉េខាងជើង ជាមួយនឹងអាមេរិចហាក់មិនមានការរីកចម្រើនទៅ
មុខសោះ បើទោះបីជាមានមានជំនួបកំពូលចំនួន ២លើករួចមកហើយរវាង មេដឹកនាំអាមេរិច ដូណាល់ ត្រាំ និងកូរ៉េខាងជើង គីម ជុងអ៊ុន។ មេដឹកនាំ អាចនឹងជួបគ្នាលើកទៅ ៣ក្នុងពេលវេលាណាមួយនៅថ្ងៃខាងមុខ។
សូមបញ្ជាក់ថា កូរ៉េខាងជើង តែងធ្វើការថ្កោលទោសរាល់ការធ្វើសមយុទ្ធរួមគ្នារវាងអាមេរិច និងកូរ៉េខាងត្បូង ដោយកូរ៉េខាងជើង ចាត់ទុកការធ្វើសមយុទ្ធរួមគ្នានោះថា ជាការហាត់សមដើម្បីត្រៀមលុកលុយកូរ៉េខាងជើង៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia
