ខេត្តស្វាយរៀងៈ លោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា កាលពីថ្ងៃទី៣ ខែសីហា ឆ្នាំ២០១៩ បានអញ្ជើញចុះជួបជាមួយអប្បមាទទូទាំងប្រទេស និងជំនួយការអប្បមាទទូទាំងប្រទេស នៅខេត្តស្វាយរៀង។
ព្រមទាំងមានការអញ្ជើញចូលរួមផងដែរពីសំណាក់លោក តូច ប៉ូលីវ៉ា អភិបាលរងខេត្តស្វាយរៀង តំណាងលោក ម៉ែន វិបុល អភិបាលខេត្តស្វាយរៀង លោក ចាន់ សុភា ប្រធាននាយកដ្ឋានបឋមសិក្សា នៃក្រសួងអប់រំ យុវជន និងកីឡា លោក ខៀវ សំអុល ប្រធានមន្ទីរអប់រំ យុវជន និងកីឡាខេត្តស្វាយរៀង លោក លោកស្រីអនុប្រធានមន្ទីរ លោក លោកស្រីប្រធាន អនុប្រធានការិយាល័យនៃមន្ទីរអប់រំ យុវជន និងកីឡាខេត្ត លោក លោកស្រីប្រធានការិយាល័យអប់រំ យុវជន និងកីឡាក្រុង ស្រុកទាំង៨ បុគ្គលិកមន្ទីរ នាយកសាលាគរុកោសល្យខេត្ត និងគរុសិស្សឆ្នាំទី១ ចំនួន១៥២ នាក់ ។
ក្នុងឱកាសនោះ លោករដ្ឋមន្ត្រីក៏បានរំលឹកពីតួនាទី និងភារកិច្ចគណៈកម្មការអប្បមាទ និងជំនួយការអប្បមាទ ដើម្បីចូមរួមក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១៩ សីហា ២០១៩ នាពេលខាងមុខនេះ ដោយលទ្ធផលទទួលយកបាន គឺ”ចេះប្រឡងជាប់”។ សូមបញ្ជាក់ថា ឆ្នាំនេះអង្គភាពប្រឆាំងអំពើពុករលួយ(ACU) មិនបានដាក់អ្នកសង្កេតការណ៍ដំណើការប្រឡងនោះទេ៕ដោយ៖ វ៉ៃកូ