ប្រទេសកូរ៉េខាងជើងបានធ្វើការបាញ់សាកល្បងមីស៊ីលចំនួន ២គ្រាប់នៅថ្ងៃអង្គារនេះដែរ គឺជាការបាញ់មីស៊ីលលើកទី ៤របស់ខ្លួនក្នុងរយៈពេលមិនដល់ ២សប្តាហ៍ផង។ នេះបើតាមការបញ្ជាក់របស់យោធាកូរ៉េខាងត្បូង។
របបព្យុងយ៉ាងបានធ្វើការបាញ់មីស៊ីលពីខេត្ត Hwanghae ហើយមីស៊ីលហោះកាត់ឧបទ្វីបធ្លាក់ចូលក្នុងសមុទ្រខាងកើត ឬហៅថាសមុទ្រជប៉ុន។
បើតាមយោធាកូរ៉េខាងត្បូង មីស៊ីល ២គ្រាប់ដែលកូរ៉េខាងជើងបាញ់នោះទំនងជាមីស៊ីលផ្លោងរយៈចំងាយខ្លី ដោយវាហោះបានចំងាយ ៤៥០គីឡូម៉ែត្រ និងបានរយៈកម្ពស់ ៣៧គីឡូម៉ែត្រ។
អាមេរិចនិយាយថា ខ្លួនកំពុងតែពិនិត្យមើលស្ថានការណ៍ និងបានធ្វើការពិភាក្សាជាមួយនឹងកូរ៉េខាងត្បូង និងជប៉ុន។
សូមបញ្ជាក់ថា ការបាញ់សាកល្បងរហូតដល់ ៤លើកមិនដល់រយៈពេល ២សប្តាហ៍ផងនោះ របស់កូរ៉េខាងជើង កើតឡើងក្រោយពេលអាមេរិច និងកូរ៉េខាងត្បូងបានប្រកាសធ្វើសមយុទ្ធរួមគ្នាឡើងវិញ ហើយបច្ចុបន្នសម្ព័ន្ធមិត្តទាំងពីរកំពុងផ្តើមធ្វើសមយុទ្ធ។
កូរ៉េខាងជើងធ្លាប់ប្រកាសថា ការបាញ់មីស៊ីលរបស់ខ្លួនគឺជាការផ្ញើសារព្រមានដល់កូរ៉េខាងត្បូង។ នៅក្នុងសេចក្តីប្រកាស កូរ៉េខាងជើងបានសម្តែងការខឹងសម្បារយ៉ាងខ្លាំងចំពោះសមយុទ្ធយោធារួមគ្នារវាងអាមេរិច និងកូរ៉េខាងជើង ដែលបានចាប់ផ្តើមធ្វើកាលពីថ្ងៃចន្ទម្សិលមិញនេះ។
កូរ៉េខាងជើងតែងតែថ្កោលទោសសមយុទ្ធនោះ និងបាត់ចាត់ទុកវាថាជាការហ្វឹកហាត់សម ដើម្បីត្រៀមឈ្លានពានកូរ៉េខាងជើង។
នៅក្នុងសេចក្តីប្រកាស កូរ៉េខាងជើងបានធ្វើការព្រមានជាច្រើនដងថា ការធ្វើសមយុទ្ធរួមគ្នារវាងអាមេរិច និងកូរ៉េខាងត្បូង នឹងធ្វើឲ្យមានការរាំងស្ទះដល់ការរីកចម្រើនទំនាក់ទំនងរវាងអាមេរិច និងកូរ៉េខាងជើង ទំនាក់ទំនងអន្តរកូរ៉េ និងធ្វើឲ្យស្ថានការណ៍ត្រឡប់ទៅរកភាពតានតឹងដូចដើមវិញ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
