ប៉ូលិសបង្ក្រាបកុបកម្មហុងកុង បានធ្វើការបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រ នៅតំបន់ជាច្រើនទូទាំងហុងកុង នៅក្នុងការប៉ះទង្គិចជាមួយនឹងក្រុមបាតុករកាលពីល្ងាចថ្ងៃចន្ទម្សិលមិញនេះ ក្រោយពេលបាតុកម្មបានធ្វើឲ្យរាំងស្ទះដល់ទីក្រុងមួយផ្នែក។
នៅពេលយប់ ក្រុមអ្នកតវ៉ារាប់ពាន់នាក់បានធ្វើការបិទផ្លូវនៅក្នុងតំបន់ជាច្រើន។ បាតុករក៏បានធ្វើការឡោមព័ទ្ធប៉ុស្តិ៍ប៉ូលិសផងដែរ និងបានធ្វើការគប់របស់រឹងដាក់អគារប៉ូលិស និងបំផ្លាញទ្រព្យសម្បតិ្តជាច្រើន។ នេះបើតាមការបញ្ជាក់របស់រដ្ឋាភិបាលហុងកុង។
រដ្ឋាភិបាលហុងកុងបានចេញសេចក្តីប្រកាសនៅម៉ោងជិត ៩យប់ថ្ងៃចន្ទថា “អ្នកតវ៉ាមួយក្រុមធំបានធ្វើការបិទផ្លូវ និងបានដុតវត្ថុផ្សេងៗជាច្រើន ដែលធ្វើឲ្យមានការគំរាមកំហែងយ៉ាងខ្លាំងដល់សុវត្ថិភាពនៃអ្នកធ្វើដំណើរតាមផ្លូវ”។
ក្នុងកំឡុងពេលបាតុកម្ម គេក៏ឃើញមានក្រុមបុរសមួយក្រុមដែលមានកាន់ដំបង និងបានដេញវាយក្រុមបាតុករ។ ក្រុមបាតុករបានធ្វើការគប់កោណ និងរបាំងដាក់លើផ្លូវ ទៅលើក្រុមនោះវិញ។
ប៉ូលិសហុងកុងបានបញ្ជាក់ថា ពួកគេបាញ់ឧស្ម័នបង្ហូរទឹកភ្នែកដើម្បីបំបែកក្រុមបាតុករដែលមានក្រុមធំៗ ដែលបានប្រមូលផ្តុំគ្នា និងបិទផ្លូវ។
បច្ចុប្បន្ន ស្ថានភាពនៅទីក្រុងហុងកុងកំពុងតែឡើងកម្តៅខ្លាំង ខណៈពេលដែលការតវ៉ាប្រឆាំងនឹងច្បាប់ធ្វើបត្យាប័នកំពុងរីកខ្លាំងទៅៗ។ ច្បាប់នោះអនុញ្ញាតឲ្យមានការបញ្ជូនអ្នកទោសពីទីក្រុងហុងកុងទៅធ្វើការកាត់ទោសនៅប្រទេសចិនបាន។ ក្រុមបាតុករទាមទារឲ្យមេដឹកនាំហុងកុងបោះបង់ចោលច្បាប់នោះ ដោយមើលឃើញថា វាមានប៉ះពាល់ដល់ឯករាជ្យប្រព័ន្ធច្បាប់របស់ហុងកុង។
សូមរលឹកថា ទីក្រុងហុងកុង ត្រូវបានអង់គ្លេសប្រគល់ឲ្យចិនវិញ នៅឆ្នាំ ១៩៩៧ ដោយស្ថិតក្រោមកិច្ចព្រមព្រៀង ប្រទេសមួយ ប្រព័ន្ធពីរ ដែលធានាឲ្យមានសិទ្ធិសេរីភាពនៅហុងកុង៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia