ខេត្តព្រះសីហនុ៖ មន្ត្រីនគរបាលចរាចរណ៍ នៃស្នងការដ្ឋាននគរបាលខេត្តព្រះសីហនុ បានចុះរៀបចំរនាំងថ្ម ដែលអាជ្ញាធរដាក់បិទហាមមិនឲ្យរថយន្តធុនធំមិនឲ្យបើកបរឆ្លងកាត់ នៅតាមផ្លូវបេតុងចុះពីវត្តលើជាថ្មីឡើងវិញ ដែលជាផ្លូវចំណោតងាយមានគ្រោះថ្នាក់ចរាចរកើតឡើង នាទីក្រុងព្រះសីហនុ។
មន្ត្រីនគរបាលចរាចរណ៍បានឲ្យដឹងថា ការចុះរៀបចំដាក់រនាំងថ្មហាមឃាត់រថយន្តដឹកទំនិញធុនធំ មិនឲ្យបើកឆ្លងកាត់កំណាត់ផ្លូវខាងលើនេះ បន្ទាប់ពីរបាំងថ្មនៅចំណុចហាមឃាត់នេះ ត្រូវបានបំផ្លាញរប៉ាត់រប៉ាយ ដោយសាររថយន្តធំបើកគៀរ ឬមានអ្នករំកិល ដើម្បីឲ្យរថយន្តដឹកទំនិញធុនធំបើកចូលបាន។
ចំណុចនេះមន្ត្រីនគរបាលខេត្តព្រះសីហនុ បញ្ជាក់ថា មិនមែនជាលើកទី១ទេ ដែលអាជ្ញាធរបរាជ័យ ចំពោះការចុះទប់ស្កាត់រថយន្ដដឹកទំនិញធុនធំ បើកឆ្លងកាត់ផ្លូវបេតុងចុះវត្តលើនេះ។ បរាជ័យ ក៏ព្រោះតែ កន្លងមកមានទាំងការដាក់របាំងដែកហាមឃាត់ផង ពោលគឺដាក់របាំងដែករួចភ្លាមៗ ក៏ត្រូវរថយន្តធុនធំបើកឆ្លងកាត់បុកបាក់រនាំងហាមឃាត់ទាំងនោះចោលអស់។ ហើយថា ផ្លូវបេតុងនេះ ក្រោយមកទៀត អាជ្ញាធរក៏បានរៀបចំដាក់ជាដុំថ្មបេតុង នៅចំណុចហាមឃាត់ផ្លូវចុះពីវត្តលើនេះបិទជំនួសវិញ ក៏ប៉ុន្តែនៅតែមិនមានប្រសិទ្ធភាពទេ ព្រោះត្រូវរថយន្តដឹកទំនិញធុនធំ បើកចូលតាមផ្លូវហាមឃាត់នេះជាដដែល។ ជាក់ស្តែង ដូចកាលពីថ្ងៃទី៥ ខែសីហា ឆ្នាំ២០១៩ម្សិលមិញនេះ មានរថយន្តដឹកឥដ្ឋមួយគ្រឿង បានបើកបំពានចូលតាមផ្លូវបេតុងឃាមឃាត់នេះ ហើយបានជួបហេតុការណ៍គ្រោះថ្នាក់ចរាចរក្រឡាប់រថយន្ត បណ្តាលឲ្យសង្កត់អ្នកជិះម៉ូតូឆ្លងកាត់ រងរបួសមនុស្សជាច្រើននាក់។
ចំណុចនេះ សមត្ថកិច្ចឲ្យដឹងថា បំរាមហាមមិនឲ្យរថយន្តធុនធំ បើកឆ្លងកាតផ្លូវបេតុង ចុះពីវត្តលើ របស់សមត្ថកិច្ច គឺខាងក្រុមហ៊ុនរថយន្តដឹកទំនិញ ឬអ្នកបើកបររថយន្តធុនធំ មិនទាន់បានចូលរួមសហការជាមួយអាជ្ញាធរនៅឡើយទេ។ ពោល គឺពួកគេ នៅតែបន្តបើកចូលតាមច្រកផ្លូវហាមឃាត់នេះដដែល ហើយបានបង្កើតបញ្ហាជាបន្តបន្ទាប់ ដោយមិនស្តាប់តាមអាជ្ញាធរហាមឃាត់ទេ។
ផ្តើមពីភាពគឃ្លើន របស់អ្នកបើកបររថយន្តធុនធំនេះ សមត្ថកិច្ចបានអះអាងថា បញ្ហាគ្រោះថ្នាក់ចរាចរ ដែលកើតឡើង នៅតាមផ្លូវបេតុងចុះពីវត្តលើ ឆ្ពោះទៅអតីតមហោស្រពចាស់ នាក្រុងព្រះសីហនុ នៅតែបន្តកើតមានជាបន្តបន្ទាប់។
បញ្ហានេះ ប្រជាពលរដ្ឋរស់នៅក្រុងព្រះសីហនុ និងសាធារណជន ថ្លែងថា តើដល់ពេលណាទើបអាជ្ញាធរស្ថាប័នពាក់ព័ន្ធ នៃរដ្ឋបាលខេត្តព្រះសីហនុ អាចទប់ស្កាត់រថយន្តដឹកទំនិញធុនធំ មិនឲ្យបើកចូលតាមផ្លូវបេតុង ចុះពីវត្តលើនេះ មានប្រសិទ្ធភាព ឬមួយក៏សូម្បីចុះអនុវត្តបម្រាមប៉ុណ្ណឹង អាជ្ញាធរជំនាញស្ថាប័នពាក់ព័ន្ធ អនុវត្តន៍មិនបានភាពជោគជ័យផងនោះ..?។
យ៉ាងនេះក្តី មន្ត្រីនគរបាលចរាចរណ៍ខេត្តព្រះសីហនុ បានរំលឹកដល់អ្នកបើកបរយានយន្តគ្រប់ប្រភេទ ត្រូវចូលរួមគោរពច្បាប់ចរាចរណ៍ផ្លូវគោក ឲ្យបានទាំងអស់គ្នា ប្រយោជន៍ដើម្បីកាត់បន្ថយអត្រាគ្រោះថ្នាក់ចរាចរនៅតាមដងផ្លូវសាធារណ ឲ្យថយចុះចំនួន៕ ដោយ៖ ដែន សីមា