ក្រចេះ៖ ស្នងការដ្ឋាននគរបាលខេត្តក្រចេះ បានឲ្យដឹងថា ប្តីកំណាចប្រើកាំបិតផ្គាក់ កាប់សម្លាប់ប្រពន្ធ រួចអូសសពទម្លាក់ទឹកប្រឡាយផ្លូវ។ ករណីនេះនគរបាលព្រហ្មទណ្ឌ កំពុងតែស្វែករកស្រាវជ្រាវចាប់ខ្លួនបុរសកំណាចជាប្តីដែលមានឈ្មោះសំ សុភ័ក្ត្រា ហៅភ័ក្ត្រ អាយុ៣១ឆ្នាំ ក្រោយពីជននេះមានចិត្តសាហាវព្រៃផ្សៃ បានយកកាំបិតផ្គាក់កាប់សម្លាប់លើស្រ្តីរងគ្រោះជាប្រពន្ធឈ្មោះគង់ ស្រីទូច អាយុ២៧ឆ្នាំ ស្ទើរដាច់ ក ស្លាប់នៅនឹងកន្លែង រួចក៏អូសសាកសពទម្លាក់ចោលក្នុងទឹកប្រឡាយ នៅក្បែរផ្លូវលំមួយកន្លែងក្នុងសង្កាត់អូរឫស្សី ក្រុងក្រចេះ នៅពេលដែលស្រ្តីរងគ្រោះ កំពុងជិះម៉ូតូត្រឡប់ពីទិញបង្អែមពីផ្សារកាលពីព្រលប់ថ្ងៃទី៥ ខែសីហា ។
នៅមិនទាន់មានប្រភពព័ត៌មានជាក់លាក់ណាបញ្ជាក់ឲ្យច្បាស់ពីដើមចមដែលឈានឲ្យមាន អំពើឃាតកម្មកាប់សម្លាប់រវាងប្តីទៅលើប្រពន្ធនេះថា បណ្តាលពីមូលហេតុអ្វីនៅឡើយនោះទេ ខណៈស្រ្តីជាប្រពន្ធបានស្លាប់ ចំណែកឯបុរសជាប្តីកំពុងតែគេចខ្លួននៅមិនទាន់ចាប់បានឡើយ។
អធិការនគរបាលក្រុងក្រចេះ លោកវរសេនីយ៍ឯក នេត លីន បានឲ្យដឹងថា ជនដៃដល់ជាប្តីបានគេចខ្លួន ក្រោយពីបង្កហេតុការណ៍កាប់សម្លាប់លើប្រពន្ធរួចមក ដោយនគរបាល កំពុងតែស្រាវជ្រាវតាមចាប់ខ្លួនជនសង្ស័យយកមកផ្តន្ទាទោស៕ ដោយ៖កូឡាប