បាត់ដំបង : ស្ថានភាពជំនន់ទឹកភ្លៀងក្នុងស្រុកសំឡូតបានវិលមករកសភាពធម្មតាដូចដើមវិញហើយ ខណៈទឹកបានស្រកហូរចាក់ចូលស្ទឹងសង្កែ ហើយផ្ទៃមេឃរាំងលែងបង្អោរភ្លៀង។
លោក ឈឿត សុគា អភិបាលស្តីទីស្រុកសំឡូត បានប្រាប់ឲ្យដឹងថា នៅមុនថ្ងៃទី៥ ខែសីហានេះទឹកភ្លៀងបានធ្លាក់យ៉ាងគំហុកជាប់ៗគ្នា ទាំងនៅតំបន់ជួរភ្នំក្នុងស្រុកសំឡូត ទាំងទឹកហូរចាក់មកពីប្រទេសថៃ ទឹកភ្លៀងពីប្រភពផ្សេងៗនេះ បានប្រសព្វចូលគ្នាត្រង់ចំណុចទំនាបក្នុងភូមិសាស្ត្រឃុំតាតោក និងឃុំសំឡូត បង្កឲ្យមានជំនន់រយៈពេលខ្លីលិចលំនៅដ្ឋានរបស់ប្រជាពលរដ្ឋជាច្រើនខ្នងផ្ទះ លិចថ្នល់ និងបណ្តាលលិចស្ពានឆ្លងកាត់លែងបានមួយចំនួនផងដែរ។ ប៉ុន្តែចាប់តាំងពីរសៀលថ្ងៃទី៥ ខែសីហាមក ជំនន់ទឹកភ្លៀងបានស្រកចុះទៅវិញ ជាបន្តបន្ទប់ រហូតដល់ថ្ងៃទី៦ ខែសីហា ឆ្នាំ២០១៩ កម្រិតទឹកបានស្រកចុះអស់ ប៉ុន្តែផ្ទៃមេឃពោរពេញទៅដោយពពកខ្មៅដេរដាស និងរលឹមជាបន្តបន្ទាប់ ។ ទឹកភ្លៀងជោរជន់ឡើងនេះ មិនបណ្តាលឲ្យមានការប៉ះពាល់ធ្ងន់ធ្ងរទៅដល់លំនៅដ្ឋាន ថ្នល់ ស្ពាន ឬផលដំណាំរបស់ប្រជាពលរដ្ឋឡើយ។
ទន្ទឹមនឹងស្ថានភាពទឹកភ្លៀងជន់ឡើងខ្ពស់យ៉ាងគំហុកនេះ ទឹកបានស្រកក្នុងរយៈពេលយ៉ាងលឿនទៅវិញដែរ ដែលផ្ទុយពីទីប្រជុំជនក្រុងបាត់ដំបង ក្រោយទឹកភ្លៀងបានស្រកនៅផ្នែកខាងលើនៃស្រុកសំឡូត ទឹកក៏បានស្រុងហូរចាក់ចូលដងស្ទឹងសង្កែយ៉ាងច្រើន ក្នុងកម្រិតកម្ពស់៩ម៉ែត្រ ខណៈកម្ពស់ទឹកនៅថ្ងៃទី៤ និងថ្ងៃទី៥ មានត្រឹមតែបាតស្ទឹងប៉ុណ្ណោះ៕ដោយ៖កូឡាប
