បាត់ដំបង៖ អាជ្ញាធរខេត្តបាត់ដំបងផ្តល់ប័ណ្ណកម្មសិទ្ធិដីធ្លីដែលធ្លាប់មានទំនាស់ជាង១០ឆ្នាំជូនពលរដ្ឋ៥០គ្រួសារក្នុងឃុំឃ្លាំងមាស ស្រុកបវេល។
នៅព្រឹកថ្ងៃទី៦ ខែសីហា ឆ្នាំ២០១៩នេះ អាជ្ញាធរខេត្តបាត់ដំបងបានចុះផ្តល់ប័ណ្ណកម្មសិទ្ធិ (វិញ្ញាបនបត្រសម្គាល់ម្ចាស់អចលនវត្ថុ) ជូនដល់ប្រជាពលរដ្ឋ៥០គ្រួសារដែលរស់នៅភូមិព្រៃព្រាល ឃុំឃ្លាំងមាស ស្រុកបវេល ខេត្តបាត់ដំបង បន្ទាប់ពីមានការខិតខំប្រឹងប្រែងដោះស្រាយ គ្រប់វិធីឈានដល់ដំណាក់កាលចុងក្រោយ បញ្ចប់រាល់ទំនាស់ប្រកបដោយការយោគយល់ និងពិសេសការសម្បទានជោគជ័យ ដើម្បីបញ្ចប់ទំនាស់ និងបញ្ចប់កង្វល់ជូនប្រជាពលរដ្ឋ សំដៅរួមចំណែកលើកកម្ពស់ស្ថានភាពគ្រួសារឲ្យប្រសើរឡើង។
លោក ងួន រតន: បានលើកឡើងថា ការបញ្ចប់វិវាទដីធ្លីក្រោមគោលការស្ម័គ្រចិត្តទាំងសងខាងនេះ បើទោះបីជាមានការខាតបង់់សម្បទានឲ្យគ្នាបន្តិចបន្តួចក្តី តែវាវិធីសាស្ត្រល្អមួយឈានដល់ការបញ្ចប់ជម្លោះដីធ្លីដ៏រ៉ាំរ៉ៃចំនួន១៥ឆ្នាំ ហើយប្រជាពលរដ្ឋទទួលសិទ្ធិគ្រប់គ្រងពេញលេញ មានសិទ្ធិចាត់ចែងឲ្យទៅដល់កូនចៅ ឬប្រើប្រាស់ដើម្បីទាញយកផលប្រយោជន៍ផ្សេងៗ ។ ជាក់ស្តែងក្នុងថ្ងៃនេះកង្វល់ដែលប្រជាពលរដ្ឋមាន នៅក្នុងខ្លួនរាប់សិបឆ្នាំកន្លងមក នឹងទទួលបានភាពច្បាស់លាស់ទទួលស្គាល់ស្របតាមផ្លូវច្បាប់ ហើយលំនាំលទ្ធផលខាងលើវាអាចជាបទពិសោធន៍៍ ទៅដល់ទីកន្លែងដ៏ទៃទៀត ដែលកំពុងតែកើតមានទំនាស់ឲ្យគ្រប់ភាគីពាក់ព័ន្ធ ត្រូវសម្លឹងមើលមុខគ្នាព្យាយាមដោះស្រាយ ក្រោមការសម្របសម្រួល ជាមួយគណៈកម្មការដោះស្រាយទំនាស់ដីធ្លីថ្នាក់ស្រុក ខេត្ត ៕ ដោយ៖បញ្ញាស័ក្តិ
