ខេត្តព្រះសីហនុ៖ មេបញ្ជាការកងរាជអាវុធហត្ថខេត្តព្រះសីហនុ គឺ លោក ហេង ប៊ុនទី បានចំណាយថវិកាផ្ទាល់ខ្លួនអស់ជាច្រើន ដើម្បីចំណាយទៅលើថ្លៃទិញថ្ម និងស៊ីម៉ង់ត៍ លាយគ្នា ដើម្បីជួសជុលកែលម្អផ្លូវថ្នល់មួយខ្សែរ ដែលខូចស្ទើរទាំងស្រុង បង្កផលវិបាកដល់ការធ្វើចរាចរណ៍ របស់យានជំនិះគ្រប់ប្រភេទបើកឆ្លងកាត់។
ទាក់ទិនបញ្ហានេះ លោក ហេង ប៊ុនទី បានឲ្យដឹងថា ដោយមើលឃើញការលំបាក របស់ប្រជាពលរដ្ឋខ្មែរ និងជនបរទេស ក្នុងការធ្វើដំណើរតាមបណ្តោយផ្លូវ ចាប់ពីចំណុចផ្លូវកែងភូមិមឹក ឆ្ពោះមកផ្លូវអារីស្តុន នាចុងឆ្នេរអូរឈើទាល និងឆ្នេរអូរត្រះចាស់ ព្រោះបច្ចុប្បន្នផ្លូវនេះ បានខូចស្ទើរទាំងស្រុង និងពិបាកដល់ការធ្វើដំណើរ និងមានការកកស្ទះចរាចរណ៍ញឹកញាប់ផងនោះ ទើបកាលពីរសៀលថ្ងៃទី៥ ខែសីហា ឆ្នាំ២០១៩។ លោកបានចាត់ឱ្យវរសេនីយ៍ឯក ប៉ែន វិបុល មេបញ្ជាការរងកងរាជអាវុធហត្ថខេត្តព្រះសីហនុ ដឹកនាំកម្លាំងអាវុធហត្ថខេត្តចំនួន១០នាក់ ឲ្យចុះសហការជាមួយក្រុមការងារផ្នែកគ្រឿងចក្រ នៃមន្ទីរសាធារណការ និងដឹកជញ្ជូនខេត្តព្រះសីហនុ ដោយលោកបានចំណាយថវិកា ចេញថ្លៃដឹកយកថ្មម៉ិចលាយស៊ីម៉ង់ត៍ ជាច្រើនឡាន ដែលជាថវិកាផ្ទាល់ខ្លួនលោក និងថវិកាសប្បុរសជននានា ក្នុងខេត្តព្រះសីហនុ ដោយដឹកយកមកចាក់បំពេញរណ្តៅគ្រហុកតូច-ធំ ដែលមានដក់ទឹក ដើម្បីពង្រាបផ្លូវខូចនេះ ឲ្យរាបស្មើឡើងវិញ ដាក់ជូនប្រជាពលរដ្ឋប្រើប្រាស់ជាបណ្តោះអាសន្នសិន មុនពេលផ្លូវនេះ ត្រូវបានរដ្ឋបាលខេត្តព្រះសីហនុ ស្ថាបនាជួសជុលឲ្យបានល្អស្អាតឡើងវិញនៅថ្ងៃខាងមុខ។
ត្រង់ចំណុចនេះ លោក ហេង ប៊ុនទី បញ្ជាក់ថា ការចំណាយថវិកាផ្ទាល់ខ្លួន ដើម្បីដឹកថ្មម៉ិចស៊ីម៉ង់ត៍ ដើម្បីចាក់ពង្រាបផ្លូវខូចជាបណ្តោះអាសន្នខាងលើនេះ គឺជាការចូលរួមចំណែកនជាមួយ ថ្នាក់ដឹកនាំរដ្ឋបាលខេត្តព្រះសីហនុ ក៏ដូចជាដើម្បីជួយសម្រួលផលវិបាក នៃការធ្វើដំណើរ របស់ប្រជាពលរដ្ឋចេញចូលតាមផ្លូវនេះ ឱ្យមានភាពងាយស្រួល និង ចំណេញពេលវេលា ជាពិសេស ដើម្បីកាត់បន្ថយការកកស្ទះចរាចរណ៍ ព្រមទាំងបញ្ជៀស នូវឧបទ្ទវហេតុគ្រោះថ្នាក់ចរាចរណ៍ផ្សេងៗ ដែលអាចនឹងកើតមានឡើងជាយថាហេតុណាមួយ៕ ដោយ៖ ដែន សីមា
