ភ្នំពេញ៖លោកទេសរដ្ឋមន្ត្រីឆាយ ថន បានប្រកាសឲ្យអនុវត្តន៍ និងប្រើប្រាស់អភិក្រមទី៥ គឺវះកាត់ ចំពោះបុគ្គលិក មន្ត្រីរាជការ ដែលនៅតែបន្តអវត្តមាន គ្មានច្បាប់ទម្លាប់ មិនទទួលខុសត្រូវនឹងការងារ ហើយបានរំលោភលើច្បាប់សហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។
លោក ឆាយ ថន រដ្ឋមន្ត្រីក្រសួងផែនការ បានផ្តល់អនុសាសន៍ចំនួន ៥ចំណុចដល់ថ្នាក់ដឹកនាំក្រសួងផែនការ ក្នុងឱកាសកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០១៩ និងលើកទិសដៅបន្តរបស់បណ្តាអង្គភាពជំនាញទាំងអស់ក្រោមឱវាទក្រសួងផែនការ។
កិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០១៩ និងលើកទិសដៅបន្តរបស់បណ្តាអង្គភាពជំនាញទាំងអស់ក្រោមឱវាទក្រសួងផែនការ ត្រូវបានប្រារព្វធ្វើឡើងនៅទីស្តីការក្រសួងផែនការ ថ្ងៃទី៥ ខែសីហា ឆ្នាំ២០១៩ ស្ថិតក្រោមអធិបតីភាពដ៏ខ្ពង់ខ្ពស់លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ ដោយមានការអញ្ជើញចូលរួមពីឯកឧត្តម លោកជំទាវ ថ្នាក់ដឹកនាំ ជារដ្ឋលេខាធិការ អនុរដ្ឋលេខាធិការ អគ្គនាយក អគ្គលេខាធិការ អគ្គាធិការ អគ្គនាយករង អគ្គាធិការរង និងប្រធាននាយកដ្ឋាន ទាំងអស់អញ្ជើញចូលរួម។
បន្ទាប់ពីបានស្តាប់របាយការណ៍អំពីសមិទ្ធផលការងារសម្រេចបានរយៈពេលក្នុងឆមាសទី១ ព្រមទាំងបញ្ហាប្រឈម ក៏ដូចជាសំណូមពរ ដែលបានលើកឡើងដោយតាមបណ្តាអង្គភាពជំនាញទាំងអស់ រួមទាំងការចូលរួមជាមតិយោបល់របស់ថ្នាក់ដឹកនាំរួចមក លោកកិត្តិសេដ្ឋាបណ្ឌិត បានមានមតិសំណាល ណែនាំ និងផ្តល់នូវអនុសាសន៍ ចំនួន៥ចំណុច ដើម្បីអង្គភាពជំនាញទាំងអស់ យកទៅកែសម្រួល និងអនុវត្តបន្តរួមមាន៖
១-ក្នុងរបាយការណ៍របស់បណ្តាអង្គភាពជំនាញទាំងអស់ ក្រៅអំពីសមិទ្ធផលការងារដែលសម្រេចបាន ត្រូវតែលើកឡើងបន្ថែមនូវបញ្ហាប្រឈម សំណូមពរ និងសេចក្តីសន្និដ្ឋានជាក់ស្តែង ដើម្បីធ្វើការវាយតម្លៃ និងមានវិធានការណ៍ដោះស្រាយឲ្យបានសមស្រប។
២-គួរតែមានការគិតគូរឱ្យបានច្បាស់លាស់ឡើងវិញ នូវរបៀបរបបការងារណា ដែលធ្វើឲ្យរាំងស្ទះ ឬដើរថយក្រោយ ត្រូវកំណែទម្រង់ប្រព័ន្ធគ្រប់គ្រងផ្ទៃក្នុង ក្នុងអង្គភាពនិមួយៗ ដើម្បីពង្រឹងប្រសិទ្ធភាពការងារបន្ថែមទៀត។
៣-សំណូមពរដល់បណ្តាអង្គភាពជំនាញទាំងអស់ រក្សាការសហការគ្នាឲ្យបានជិតស្និទ្ធក្នុងការរៀបចំគម្រោងកម្មវិធីអនុវត្តការងារផ្សេងៗ ឲ្យបានស៊ីសង្វាក់គ្នា។
៤-បញ្ហាបុគ្គលិក មន្ត្រីរាជការ សំណូមពរដល់ថ្នាក់ដឹកនាំទាំងអស់ ត្រូវចេះដឹកនាំ សម្របសម្រួល បណ្តុះបណ្តាល ក៏ដូចជាការបែងចែកការងារ ការទទួលខុសត្រូវ តាមកម្រិតជំនាញរបស់បុគ្គលិក មន្ត្រីរាជការ របស់ខ្លួន។
៥-ចំពោះបុគ្គលិក មន្ត្រីរាជការ ដែលនៅតែបន្តអវត្តមាន គ្មានច្បាប់ទម្លាប់ មិនទទួលខុសត្រូវនឹងការងារ ហើយបានរំលោភលើច្បាប់សហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា លោកកិត្តិសេដ្ឋាបណ្ឌិត នឹងមិនរាថយឡើយក្នុងការប្រើប្រាស់អភិក្រមទី៥ គឺវះកាត់ លោកកិត្តិសេដ្ឋាបណ្ឌិត សូមឯកភាព និងលើកទឹកចិត្តដល់បណ្តាថ្នាក់ដឹកនាំអង្គភាពជំនាញទាំងអស់ សហការគ្នាជាមួយនាយកដ្ឋានបុគ្គលិក ពង្រឹងនូវវត្តមានមន្ត្រីរាជការក្រោមឱវាទរបស់ខ្លួនឡើងវិញ ប្រកាប់ខ្ជាប់ និងអនុវត្តតាមច្បាប់សហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា និងបន្តឈានទៅប្រើប្រាស់អភិក្រមទី៥ គឺវះកាត់តែម្តង៕ ដោយ៖កូឡាប
