ភ្នំពេញ៖ ថ្ងៃទី ៦ ខែសីហា ឆ្នាំ ២០១៩ នៅទីស្តីការក្រសួងសុខាភិបាល គណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន បានបើកកិច្ចប្រជុំពិភាក្សាស្តីពីការងារព្យាបាល និងស្តារនីតិសម្បទាអ្នកញៀនគ្រឿងញៀន ក្រោមអធិបតីភាពលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន។
កិច្ចប្រជុំបានពិនិត្យមើលលទ្ធភាពនៃការដាក់ឱ្យដំណើរការមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀននៅកែវផុស ខេត្តព្រះសីហនុ និងយន្តការសម្របសម្រួលដើម្បីពង្រឹងការព្យាបាលអ្នកញៀនគ្រឿងញៀនដោយផ្អែកលើសហគមន៍ ជាពិសេស ជំរុញការអនុវត្តសកម្មភាពស្របតាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមាននៅក្នុងសារលិខិតរបស់សម្តេចតេជោ លេខៈ ២៦ សលខ ចុះថ្ងៃទី ៤ ខែមិថុនា ឆ្នាំ២០១៩។
ជាលទ្ធផល កិច្ចប្រជុំបានពិនិត្យឃើញថាស្ថាប័ន និងអង្គភាពពាក់ព័ន្ធក្នុងការចូលរួមដំណើរការមជ្ឍមណ្ឌលជាតិព្យាបាល និងនិងស្តារនីតិសម្បទាអ្នកញៀនគ្រឿងញៀន នៅខេត្តព្រះសីហនុនោះ បានត្រៀមលក្ខណ:រួចជាស្រេចក្នុងការចាត់បញ្ជូន មន្ត្រីជំនាញដើម្បីទៅបម្រើការក្នុងមជ្ឈមណ្ឌលជាតិនេះ មានជាអាទិ៍ ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងការងារ និងបណ្តុះបណ្តាលវិជ្ជាជីវៈ ដោយរងចាំតែការសាងសង់មជ្ឈមណ្ឌលនេះ ឱ្យចប់សព្វគ្រប់តែប៉ុណ្ណោះ។
លោករដ្ឋមន្ត្រី បានបញ្ជាក់ថាឲ្យតែមានផ្លូវអាចទ្រទ្រង់ការប្រើប្រាស់បាន ក្រសួងសុខាភិបាលអាចដាក់រថយន្តគ្លីនិកចល័តប្រើប្រាស់ជាបណ្តោះអាសន្នសិនបាន តែបញ្ហាត្រង់ថា អគារត្រូវតែរួចរាល់មានទឹក មានភ្លេីង សម្រាប់ប្រតិបត្តិការ និងបុគ្គលិកទាំងអស់ រួមទាំងពេទ្យ អាចស្នាក់នៅបានផងដែរ។
ចំពោះការងារព្យាបាលអ្នកញៀនគ្រឿងញៀនដោយផ្អែកលើសហគមន៍ ក្រសួងសុខាភិបាល បានពង្រីកសេវាព្យាបាលដោយផ្អែកលើសហគមន៍ បានចំនួន ៤៣១ កន្លែង និងបានរៀបចំគម្រោងសាកល្បងការព្យាបាលអ្នកញៀនគ្រឿងញៀន ដោយផ្អែកលើសហគមន៍ក្នុងភាពជាដៃគូជាមួយមន្ត្រីអនុវត្តន៍ច្បាប់នៅសង្កាត់ច្បារអំពៅ ១ និងច្បារអំពៅ២ ខណ្ឌច្បារអំពៅ។ ក្នុងការងារព្យាបាលអ្នកញៀនគ្រឿងញៀនដោយផ្អែកលើសហគមន៍នេះ ក្រសួងសុខាភិបាលបានពិនិត្យឃើញថា ការព្យាបាលនេះត្រូវការជាចាំបាច់នូវការចូលរួមពីមន្ត្រីអនុវត្តច្បាប់ និងសហគមន៍ផងដែរ។ ក្នុងន័យនេះ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការទទួលបន្ទុការងារព្យាបាល និងស្តារនីតិសម្បទាអ្នកញៀនគ្រឿងញៀន បានណែនាំឱ្យពង្រីកកម្មវិធីព្យាបាលអ្នកញៀនគ្រឿងញៀនដោយផ្អែកលើសហគមន៍ ក្នុងភាពជាដៃគូជាមួយមន្ត្រីអនុវត្តច្បាប់ឱ្យបានកាន់តែទូលំទូលាយថែមទៀតក្នុងរាជធានីភ្នំពេញជាជំហានដំបូងសិន។ លើសពីនេះ ឯកឧត្តមរដ្ឋមន្ត្រី បានជម្រុញឲ្យនាយកដ្ឋានសុខភាពផ្លូវចិត្ត និងការបំពានគ្រឿងញៀននៃក្រសួងសុខាភិបាល ខិតខំបណ្តុះបណ្តាលបន្ថែមលើការពិនិត្យ និងព្យាបាលអ្នកញៀនគ្រឿងញៀននៅតាមមន្ទីពេទ្យនិងមន្ទីពេទ្យបង្អែកទូទាំងប្រទេស ដើម្បីអាចជួយគ្នាក្នុងការផ្តល់សេវានៅតាមទីកន្លែងរបស់ខ្លួន កាន់តែបានល្អប្រសើរឡើង ព្រមទាំងត្រៀមរៀបចំដាក់ចូលក្នុងកម្មវិធីបណ្តុះបណ្តាលនៅសាកលវិទ្យាល័យវិទ្យាសាស្ត្រសុខាភិបាលនាេពលខាងមុខផងដែរ ដោយត្រូវិនិត្យលេី curriculum សម្រាប់ការបង្រៀនផ្នែកនេះជាមុនសិនផងដែរ។
យោងតាមប្រសាសន៍របស់ លោក មាស វីរឹទ្ធ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃ មាត្រា ១០០ នៃច្បាប់ស្តីពីការត្រួតពិនិត្យគ្រឿងញៀន នឹងត្រូវកែសម្រួលនាពេលខាងមុខនេះ ដើម្បីឲ្យយន្តការនៃការសម្របសម្រួលនិងបញ្ជូនអ្នកញៀនគ្រឿងញៀនមកទទួលសេវាពិនិត្យ និងព្យាបាលដោយស្ម័គ្រចិត្ត ផ្អែកលើសហគមន៍ ក្នុងភាពជាដៃគូជាមួយមន្ត្រីអនុវត្តន៌ច្បាប់ អាចមានភាពរលូនក្នុងការអនុវត្ត៕ ដោយ៖កូឡាប
