ភ្នំពេញ ៖មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានបើកប្រតិបត្តិការបង្ក្រាបក្រុមចែកចាយគ្រឿងញៀន ជាបន្ដបន្ទាប់ចំនួន៣នាក់ និងដកហូតបានថ្នាំញៀនជាង២គីឡូក្រាម នៅខណ្ឌច្បារអំពៅ និងខណ្ឌចំការមន រាជធានីភ្នំពេញ។
មន្ដ្រីជាន់ខ្ពស់ នៃមន្ទីរប្រឆាំងគ្រឿងញៀន បានថ្លែងឲ្យដឹងនៅរសៀលថ្ងៃទី០៦ ខែសីហា ឆ្នាំ២០១៩នេះថា ដោយអនុវត្តតាមការបញ្ជាដឹកនាំរបស់ឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងគ្រឿងញៀន និងឯកឧត្តម ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន នៅថ្ងៃទី៥ ខែសីហា ឆ្នាំ២០១៩ វេលាម៉ោង២០និង៤០នាទី លោកឧត្តមសេនីយ៍ទោ វ៉ាន់ កុសល នាយករងមន្ទីរប្រឆាំងគ្រឿងញៀន ដឹកនាំផ្ទាល់កម្លាំងជំនាញ (ក៨) នៃមន្ទីរប្រឆាំងគ្រឿងញៀន បានចុះបង្ក្រាបក្រុមមុខសញ្ញាជួញដូរគ្រឿងញៀនយ៉ាងសកម្ម នៅ២ គោលដៅផ្សេងគ្នាជាបន្តបន្ទាប់ ឃាត់ខ្លួនជនសង្ស័យ៣នាក់ និងដកហូតថ្នាំញៀនជាង២គីឡូក្រាម ។
គោលដៅទី១ នៅចំណុចផ្លូវបេតុង សង្កាត់និរោធ ខណ្ឌច្បារអំពៅ និងគោលដៅទី២ នៅចំណុចផ្ទះលេខ២៨AZ ផ្លូវលេខ២៧៨ សង្កាត់អូរឡាំពិក ខណ្ឌចំការមន រាជធានីភ្នំពេញ ។
លទ្ធផលប្រតិបត្តិការខាងលើ កម្លាំងបានចាប់ឃាត់ខ្លួនជនសង្ស័យចំនួន០៣នាក់ រួមមាន ៖ ១-ឈ្មោះ អាន វាសនា ភេទប្រុស អាយុ៣៨ឆ្នាំ ជនជាតិខ្មែរ, ២-ឈ្មោះ សេក ស្រីប៉ុច ភេស្រី អាយុ៣១ឆ្នាំ ជនជាតិខ្មែរ និង៣-ឈ្មោះ ម៉ែន សុទ្ធសំណាង ភេទប្រុស អាយុ២៦ឆ្នាំ ជនជាតិខ្មែរ ។
វត្ថុតាងចាប់យក៖ សារធាតុញៀនសរុប ទម្ងន់ ២ គីឡូក្រាម និង១១១.៤២ក្រាម ក្នុងនោះ ១-មេតំហ្វេតាមីន គ្រាប់(WY)ទម្ងន់ ១៧៧,៤៦ក្រាម, ២-អ៊ិចស្តាស៊ីគ្រាប់ និងម្សៅទម្ងន់ ១៩៣៣,៩៦ក្រាម ។
ជនសង្ស័យ រួមនឹងវត្ថុតាង កម្លាំងជំនាញកសាងសំណុំរឿងអនុវត្តតាមនីតិវិធី ៕ ដោយ៖បញ្ញាស័ក្តិ
