ខេត្តឧត្តរមានជ័យ៖អគ្គលេខាធិការគណៈកម្មាធិការជាតិអូឡាំពិកកម្ពុជា បានលើកឡើងក្នុងកិច្ចប្រជុំ នៅស្រុកអន្លង់់់វែង នឹងត្រៀមរៀបចំព្រឹត្តិការណ៍កីឡាទេសចរណ៍ថ្មើរជើងក្នុងតំបន់ប្រវត្តិសាស្រ្តអន្លង់វែង នៅថ្ងៃទី១ ខែកុម្ភៈ ឆ្នាំ២០២០ខាងមុខនេះ។
លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានស្នើឱ្យខាងមជ្ឈមណ្ឌលឯកសារកម្ពុជា ត្រូវតែផ្សព្វផ្សាយឱ្យបានទូលំទូលាយដល់ដល់អង្គទូត ឬមហាជនអំពីព្រឹត្តិការណ៍កីឡាទេសចរណ៍ថ្មើរជើងនេះ ក្នុងគោលបំណងទាក់ទាញភ្ញៀវបរទេសចូលរួមឲ្យបានច្រើន ជាពិសេស អាជ្ញាធរខេត្តត្រូវរៀបចំកិច្ចប្រជុំ ជាមួយភាគីថៃដើម្បីឱ្យភាគីថៃជួយផ្សព្វផ្សាយដល់ប្រជាពលរដ្ឋរបស់ខ្លួនឱ្យបានចូលរួមក្នុងព្រឹត្តិការណ៍នេះ។
លោក ឌី រ៉ាដូ អភិបាលរងខេត្តឧត្តរមានជ័យ បានឱ្យដឹងថា ការរៀបចំព្រឹត្តិការណ៍នេះ នៅលើទឹកដីស្រុកអន្លង់វែងនេះ ក្នុងគោលបំណង គឺរំលឹកខួបនៃការបញ្ចប់សង្រ្គាមស៊ីវិលចុងក្រោយគេបង្អស់ ក្រោមនយោបាយឈ្នះឈ្នះរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីទាក់ទាញភ្ញៀវជាតិ អន្តរជាតិ ឱ្យមកស្វែងយល់អំពីទីតាំងប្រវត្តិសាស្រ្តជាច្រើនកន្លែងនៅទីនេះមានជាអាទិ៍ សារមន្ទីរតាម៉ុក សាលារៀន មន្ទីរពេទ្យ ស្ពាន និងទីកន្លែងដុតខ្មោចប៉ុលពត រួមទីតាំងពាក់ព័ន្ធដទៃទៀតផងដែរ៕ ដោយ៖កូឡាប
