ក្រចេះ៖ ឃាតករម្នាក់ជាប្តី ត្រូវបានសមត្ថកិច្ចចាប់ខ្លួនបានហើយ បន្ទាប់ពីប្រើកាំបិតផ្គាក់ កាប់សម្លាប់ប្រពន្ធមិនញញើតដៃ កាលពីវេលាម៉ោង ៦និង៣០នាទីព្រឹក ថ្ងៃទី៧ ខែសីហានេះ នៅចំណុច ឃ្លៃទទឹង ឃុំក្បាលដំរី ស្រុកសំបូរ ខេត្តក្រចេះ។
ជនដៃដល់ជាប្តីឈ្មោះសំ សុភ័ក្ត្រា ភ័ក្ត្រ អាយុ៣១ឆ្នាំ ដែលបានធ្វើសកម្មភាពកាប់សម្លាប់ប្រពន្ធហើយគេចខ្លួននោះ ត្រូវបានកម្លាំងនគរបាលក្រុងក្រចេះ សហការជាមួយនគរបាលស្រុកសំបូរ និងនគរបាលព្រហ្មទណ្ឌខេត្ត ស្រាវជ្រាវចាប់ឃាត់ខ្លួនបាន។
អធិការនគរបាលក្រុងក្រចេះ លោកវរសេនីយ៍ឯក នេត លីន បានឲ្យដឹងថា ជនដៃដល់បានធ្វើសកម្មភាពកាប់សម្លាប់ទៅលើស្ត្រីរងគ្រោះជាប្រពន្ធឈ្មោះគង់ ស្រីទូច អាយុ២៧ឆ្នាំ ដោយប្រើកាំបិតផ្គាក់ កាប់ស្ទើរដាច់ ក បណ្តាលឲ្យស្លាប់នៅនឹងកន្លែង រួចក៏អូសសាកសពទម្លាក់ចោលក្នុងទឹកប្រឡាយ នៅក្បែរផ្លូវលំមួយកន្លែង ក្នុងសង្កាត់អូរឫស្សី ក្រុងក្រចេះ ខណៈពេលដែលស្ត្រីរងគ្រោះ កំពុងជិះម៉ូតូត្រឡប់ពីទិញបង្អែមពីផ្សារកាលពីព្រលប់ ថ្ងៃទី៥ ខែសីហា។ ក្រោយការឃាត់ខ្លួនជនដៃដល់ ត្រូវបាននាំខ្លួនមកស្នងការដ្ឋានដើម្បីបន្តនីតិវិធី។
គួរបញ្ជាក់ថា ករណីឃាតកម្មនេះ បានកើតឡើងកាលពីវេលាម៉ោង ១៩:៣០នាទីថ្ងៃទី៥សីហាឆ្នាំ២០១៩ នៅភូមិអូរឫស្សី២ សង្កាត់អូរឫស្សី ក្រុងក្រចេះ ខេត្តក្រចេះ (ម្ដុំវត្តហុងឡាំ)៕ដោយ៖កូឡាប
