បាត់ដំបង៖ ក្រោយការសង្គ្រោះអស់រយៈពេលជាច្រើនម៉ោងរបស់សមត្ថកិច្ចជំនាញ ជនរងគ្រោះដែលគាបជាប់ត្រង់ចន្លោះថ្មភ្នំហុង ស្រុកភ្នំព្រឹក ពេលនេះធានាសុវត្ថិភាពបាន៧០%ហើយ។
លោក សារ៉េត ពិសេដ្ឋ អធិការនគរបាលស្រុកភ្នំព្រឹក បានប្រាប់ឲ្យដឹងនៅរសៀលថ្ងៃទី៧ ខែសីហា ឆ្នាំ២០១៩នេះថា ការព្យាយាមជួយសង្គ្រោះដល់ជនរងគ្រោះដែលធ្លាក់កៀបជាប់នៅចន្លោះថ្មភ្នំមកដល់រសៀលថ្ងៃទី៧ សីហានេះបានធានាសុវត្ថិភាពលែងប្រឈមនឹងការប៉ះពាល់ដល់អាយុជីវិតហើយ ដោយក្រុមការងារបានប្រើប្រាស់មធ្យោបាយថ្ពក់ខ្សែពួរួចទាញរំកិលម្តងបន្តិចៗរហូតរបូតផុតក្បាលនិងស្មាហើយ ដោយម៉ោងនេះនៅកៀបជាប់តែត្រគាកប៉ុណ្ណោះ ទោះបីជាយ៉ាងណា ការប្រឹងប្រែងរបស់កម្លាំងគណៈបញ្ជាការរួមទាំងក្រុមគ្រូពេទ្យផងដែរ ជនរងគ្រោះអាចនឹងសង្គ្រោះបានក្នុងរយៈខ្លីខាងមុខ។
ពេលរថយន្តដែលបំពាក់ឧបករណ៍សង្គ្រោះរបស់មន្ទីរពេទ្យខេត្តក៏កំពុងត្រៀមរួចហើយដែរនៅនឹងកន្លែង។
ជនរងគ្រោះមានឈ្មោះស៊ុម បូរា ភេទប្រុសអាយុ២៨ឆ្នាំ រស់នៅភូមទឹកថ្លា ឃុំអង្គរបាន ស្រុកសំពៅលូន ខេត្តបាត់ដំបង ជនរងគ្រោះខាងលើបានរអិលជើងធ្លាក់ចូលក្នុងចន្លោះជ្រលងភ្នំកៀបជាប់ខ្លួន ខណៈដើរឡើងភ្នំហុងស្ថិតក្នុងភូមិហុងទឹក ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង៕ ដោយ៖កូឡាប
