តាកែវ ៖ លោក ខាន់ សុខា អភិបាលរងខេត្តតាកែវ បានមានប្រសាសន៍ថា ការបំផុសចលនាដល់ប្អូនប្រជាពលរដ្ឋ និងលោកគ្រូអ្នកគ្រូ សិស្សានុសិសក្សនូវតាមសាលារៀន ឬវត្តអារាមឲ្យចូលរួមដាំកូនឈើឲ្យបានច្រើន វាជាការចូលរួមចំណែក បង្កើនកម្របធនធានព្រៃឈើ ថែរក្សាលំនឹងបរិស្ថាន ទប់ស្កាត់ល្បឿនខ្យល់ ការពារទឹកជំនន់ហូរច្រោះ ហើយកាន់តែពិសេសនោះ ធ្វើឲ្យខេត្តរបស់យើងទៅថ្ងៃខាងមុខសម្បូរទៅដោយដើមឈើ ដែលកម្រទ្បើងវិញ និងក្លាយជាតំបន់រុក្ខជាតិពណ៌បៃតង ។
ថ្លែងបែបនេះ នៅពេលដែលលោក ខាន់ សុខា អភិបាលរងខេត្តតាកែវ ចូលរួមក្នុងពីធីចែក និងដាំកូនឈើនៅថ្នាលបណ្តុះកូនឈើ សម្តេច ហ៊ុន សែន ភ្នំជីសូរ កាលពីរសៀលថ្ងៃទី៧ ខែ សីហា ឆ្នាំ ២០១៩ នេះ ថា តំបន់រុក្ខជាតិបៃតងអាចកើតឡើងទៅបាន គឺទាល់តែមានការចូលរួម ធ្វើសកម្មភាពពីសំណាក់បងប្អូនប្រជាពលរដ្ឋ និងសិស្សានុសិស្សទាំងអស់ នៅតាមសាលារៀន ចូលរួមដាំកូនឈើ និងថែរក្សាឲ្យបានល្អ ដែលសកម្មភាពនេះ ជាការរួមចំណែកយ៉ាងធំធេងណាស់ ក្នុងការបង្កើនធនធានព្រៃឈើ ដែលជាជាប្រភេទឈើកម្រ ក៏ដូចជា បង្កើនគម្របព្រៃឈើនៅក្នុងខេត្តតាកែវរបស់យើង ឲ្យបានកាន់តែច្រើនសម្បូរបែបទ្បើងវិញ ។ហើយការបំផុសចលនាឲ្យមានការចូលរួមពីបងប្អូនប្រជាពលរដ្ឋ និងសិស្សានុសិស្ស ឲ្យបានកាន់តែច្រើននៅគ្រប់ស្រុក ឃុំ សាលារៀនទូទាំងខេត្តយើងនោះ សង្ឃឹមថា នៅថ្ងៃខាងមុខ នៅតាមមូលដ្ឋានក្នុងខេត្តយើងទាំងមូល និងសម្បូរទៅដោយធនធានធម្មជាតិ ពិសេសនោះគឺកូនឈើដែលកម្រនិងជិតផុតពូជនោះ និងកើតមានទ្បើងវិញ នៅលើទឹកដីដ៏ចំណាស់របស់ខេត្តតាកែវយើងនេះ ។
លោកអភិបាលរងខេត្ត បានធ្វើការផ្តាំផ្ញើទៅកាន់បងប្អូនប្រជាពលរដ្ឋ និងសិស្សានុសិស្ស លោកគ្រូអ្នកគ្រូ ដែលបានមកទទួលយកកូនឈើនៅថ្ងៃនេះ ត្រូវយកទៅដាំនិងមើលថែដាក់ជីបំប៉នឲ្យបានធំធាត់ល្អ ឲ្យបានគ្រប់ៗគ្នា និងគ្រប់ៗសាលា ដើម្បីបានជាប្រយោជន៍ដល់យើងវិញ ដូចជា ផ្តល់ជាម្លប់ ជួយទប់ល្បឿនខ្យល់បក់បោក ការពារទឹកជំនន់ហូរច្រោះបាក់ដី និងផ្តល់ភាពអនុគ្រោះដល់ជីវិតមនុស្សសត្វផងដែរ ។
ជាចុងបញ្ចប់តាមការបញ្ជាក់របស់លោក ស៊ឹម ទ្បាបុ័ង នាយខណ្ឌរដ្ឋបាលព្រៃឈើខេត្តតាកែវ ថា ថ្នាលបណ្តុះកូនឈើ សម្តេចតេជោ ហ៊ុន សែន ភ្នំជីសូរនេះ ត្រូវបានបង្កើតទ្បើងក្នុងឆ្នាំ ១៩៩៥ លើផ្ទៃដី ៥០០០ម៉ែត្រការ៉េ ដែលស្ថិតនៅក្នុងភូមិពោធិ៍ ឃុំស្លា ស្រុកសំរោង ដែលអាចផលិតកូនឈើហូបផ្លែ និងកូនឈើកម្រផ្សេងៗ សម្រាប់ចែកជូនបងប្អូនប្រជាពលរដ្ឋយកទៅដាំ ក្នុងមួយឆ្នាំប្រហែល ៣០.០០០ ដើម ក្រោមជំនួយថវិការបស់រដ្ឋ និងការរួមចំណែករបស់ខណ្ឌរដ្ឋបាលព្រៃឈើតាកែវផ្ទាល់ផងដែរ ៕ ដោយ៖ តាកែវ
