បាត់ដំបង៖ បើកបរម៉ូតូខ្វះការប្រុងប្រយ័ត្ន និងមិនមានភ្លើងបំភ្លឺត្រឹមត្រូវ បង្កឲ្យមានគ្រោះថ្នាក់ចរាចរ ម្ខាងស្លាប់ និងម្ខាងទៀត របួសធ្ងន់ធ្ងរ២នាក់។
ប្រភពព័ត៌មានពីកម្លាំងកងអាវុធហត្ថ បានឲ្យដឹងថា គ្រោះថ្នាក់ចរាចរនេះ បានកើតឡើងនៅអំឡុងវេលាម៉ោង៧និង១០នាទីយប់ ថ្ងៃទី៧ ខែសីហា ឆ្នាំ២០១៩ ត្រង់កំណាត់ផ្លូវលេខ៥៩ ស្ថិតក្នុងភូមិអូរ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង។
ជនរងគ្រោះស្លាប់មានឈ្មោះទូច គ្រត ភេទប្រុស អាយុ៥២ឆ្នាំ បច្ចុប្បន្នរស់នៅភូមិអូរប្រយុទ្ធ ឃុំអូររំដួល ស្រុកភ្នំព្រឹក ជាទាហានបានធ្វើដំណើរផ្ទុយទិសគ្នា ពីត្បូងទៅជើង ដោយម៉ូតូម៉ាកហុងដាឌ្រីម ពណ៌ខ្មៅ គ្មានផ្លាកលេខ និងគ្មានភ្លើងបំភ្លឺផ្លូវត្រឹមត្រូវ ហើយបើកបរលឿន ទើបបុកគ្នាពេញទំហឹង ជាមួយនឹងភាគីម៉ូតូម្ខាងទៀត បើកបរម៉ូតូម៉ាកអឹមអេសអិច ក្នុងគោលបំណងឡើងផ្លូវថ្នល់បណ្តាលឲ្យរងរបួសធ្ងន់ចំនួន២នាក់ មានឈ្មោះជួន ចន្នី ភេទប្រុស អាយុ២៥ឆ្នាំ និងអ្នករួមដំណើរម្នាក់ទៀតឈ្មោះសារ៉ា ភេទស្រី អាយុ២៣ឆ្នាំ ទាំង២នាក់រស់នៅភូមិ ឃុំកន្លែងកើតហេតុជាមួយគ្នា ។
បច្ចុប្បន្នវត្ថុតាងម៉ូតូទាំង២គ្រឿងត្រូវបានយកទៅរក្សាទុកនៅអធិការដ្ឋាននគរបាលស្រុកភ្នំព្រឹក ចំណែកឯសាកសពជនរងគ្រោះ សមត្ថកិច្ចជំនាញបានប្រគល់ឲ្យឲ្យសាច់ញាតិ នឹងអ្នករបួសត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកសំពៅលូន ៕ដោយ៖កូឡាប