ការនាំចេញរបស់ចិនបានកើនឡើងហួសពីការរំពឹងទុកក្នុងខែកក្កដា ទោះបីកំពុងស្ថិតក្នុងភាពតានតឹងផ្នែកពាណិជ្ជកម្មជាមួយអាមេរិច។
បើតាមតួលេខផ្លូវការបានបង្ហាញថា ការនាំចេញរបស់ចិនបានកើនឡើងចំនួន ៣,៣ភាគរយកាពីខែមុន បើធៀបទៅនឹងការព្យាករណ៍ដែលទាយថានឹងមានការធ្លាក់ចុះ ២ភាគរយ។
ចំណែកការនាំចូលបានធ្លាក់ចុះចំនួន ៥,៦ភាគរយក្នុងខែកក្កដា ដែលការព្យាករណ៍រំពឹងថាមានការធ្លាក់ចុះ ៨,៣ភាគរយ។
ទោះយ៉ាងណា អ្នកវិភាគនិយាយថា សេដ្ឋកិច្ចរបស់ចិននឹងនៅតែបន្តស្ថិតក្រោមសម្ពាធ ខណៈដែលអាមេរិចកំពុងរៀបចំដាក់ពន្ធលើផលិតផលនាំចូលពីចិននៅខែក្រោយ។
បើតាមការប្រកាសរបស់ប្រធានាធិបតីអាមេរិចដូណាល់ ត្រាំ កាលពីពេលថ្មីៗនេះ អាមេរិចនឹងធ្វើការយកពន្ធលើផលិតផលនាំចូលពីចិនថ្មីទៀត ដែលមានតម្លៃទឹកប្រាក់ ៣០០ពាន់លានដុល្លា នៅថ្ងៃទី ១ ខែកញ្ញាខាងមុខ ក្រោយពេលការចរចារផ្នែកពាណិជ្ជកម្មរវាងប្រទេសមហាអំណាចសេដ្ឋកិច្ចទាំងពីរហាក់មិនសូវអោយផល៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC