(បន្ទាយមានជ័យ) ៖ លោកឧត្តមសេនីយ៍ត្រី បោន ប៊ិន បាន ផ្សព្វផ្សាយជំនាញការិយាល័យបុគ្គលិក ឲ្យអនុវត្តដីកាចាប់ខ្លួនទណ្ឌិត សម រង្សុី និងកងកម្លាំងអាវុធហត្ថទាំងអស់ត្រូវស្មោះត្រង់ជាមួយរដ្ឋាភិបាលស្របច្បាប់ និងគោរពវិន័យ គោរពបទបញ្ជា ។
ថ្ងៃព្រហស្បត្តិ៍ ទី០៨ ខែសីហា ឆ្នាំ២០១៩ នៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានបើកកិច្ចប្រជុំត្រួតពិនិត្យការអនុវត្តន៍តួនាទី-ភារកិច្ច ការងារកងរាជអាវុធហត្ថប្រចាំខែសីហា ឆ្នាំ២០១៩ និងទិសដៅការងារបន្តខែកញ្ញា ឆ្នាំ២០១៩ និងផ្សព្វផ្សាយជំនាញការិយាល័យបុគ្គលិក ព្រមទាំងផ្សព្វផ្សាយ ការអនុវត្តដីកាចាប់ខ្លួនទណ្ឌិត សម រង្សុីផងដែរ។ កិច្ចប្រជុំនេះប្រព្រឹត្តធ្វើឡើង ក្រោមអធិបតីភាព លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ដោយមានការអញ្ជើញចូលរួមពីសំណាក់លោកមេបញ្ជាការរង នាយរងសេនាធិការ ប្រធាន អនុប្រធានមន្ទីរ លោកនាយការិយាល័យ លោកមេបញ្ជាការមូលដ្ឋានកងរាជអាវុធហត្ថក្រុង-ស្រុកទាំង៩ នាយទាហាន-នាយទាហានរង នៃកងរាជអាវុធហត្ថជាច្រើនរូប។
ក្នុងកិច្ចប្រជុំនោះដែរ លោកឧត្តមសេនីយ៍ត្រី មេបញ្ជាការបានមានប្រសាសន៍ថា កម្លាំងអាវុធហត្ថទាំងអស់ត្រូវស្មោះត្រង់ជាមួយរដ្ឋាភិបាលស្របច្បាប់ និងគោរពវិន័យ គោរពបទបញ្ជា លោកឧត្ដមសេនីយ៍មេបញ្ចាការបានបន្តទៀតថា កម្លាំងអាវុធហត្ថទាំងអស់ត្រូវត្រៀមសម្ភារៈ គ្រឿងបំពាក់ដើម្បីត្រៀមទទួលការចុះត្រួតពិនិត្យរបស់គណៈកម្មការកងរាជអាវុធហត្ថលើផ្ទៃប្រទេស ដឹកនាំដោយលោកឧត្ដមសេនីយ៍ទោ ស សំបូរធន មេបញ្ជាការរងកងរាជអាវុធហត្ថលើផ្ទៃប្រទេសជានាយសេនាធិការ។ លោកឧត្ដមសេនីយ៍មេបញ្ជាការក៏បានផ្សព្វផ្សាយផែនការ៨ចំណុចរបស់លោកនាយឧត្ដមសេនីយ៍ សៅ សុខា អគ្គមេបញ្ជាការរង នៃកងយោធពលខេរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ដែលមានខ្លឹមសារ ៖
១-ត្រូវយកចិត្តទុកដាក់ស្រាវជ្រាវ និងក្ដាប់នូវរាល់ព័ត៍មាន។
២-ស្រាវជ្រាវ និងក្ដាប់មុខសញ្ញាបទល្មើសព្រហ្មទណ្ឌ និងបទល្មើសគ្រឿងញៀន។
៣-ត្រូវយកចិត្តទុកដាក់គ្រប់គ្រងកម្លាំងឲ្យបានល្អ។
៤-ត្រូវយកចិត្តទុកដាក់ការប្រើប្រាស់បរិក្ខា និងគ្រឿងបំពាក់ឲ្យបានត្រឹមត្រូវ។
៥-បង្កើនសហប្រតិបត្តិការ ជាមួយអាជ្ញាធរមូលដ្ឋានក្រុង-ស្រុក។
៦-ការលេង facebook ឲ្យមានប្រយោជន៍សម្រាប់សង្គមជាតិ។
៧-ត្រូវកសាងអង្គភាពឲ្យបានរឹងមាំ។
៨-បង្កើនការសាមគ្គីភាព ដូចទិសស្លោករបស់លោកនាយឧត្ដមសេនីយ៍(រួមគិត រួមធ្វើ និងរួមគ្នាទទួលខុសត្រូវ)។ ជាកិច្ចបញ្ចប់លោកឧត្ដមសេនីយ៍ត្រីមេបញ្ជាការបានធ្វើការផ្តាំផ្ញើដល់កងកម្លាំងទាំងអស់ត្រូវបន្តអនុវត្តន៍ឲ្យបានម៉ឺងម៉ាត់នូវរាល់បទបញ្ញត្តិ និងបទបញ្ជារបស់ថ្នាក់លើ និងក្ដាប់រាល់សភាពការណ៍ក្នុងភូមិសាស្ត្រទទួលខុសត្រូវរបស់ខ្លួនផងដែរ៕ ដោយ៖កូឡាប
