ខេត្តស្វាយរៀងៈ នាព្រឹកថ្ងៃ៨ ខែសីហា ឆ្នាំ២០១៩នេះ លោក ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានដឹកនាំប្រតិភូនៃគណៈកម្មការ ជួបប្រជុំជាមួយរដ្ឋបាលខេត្តស្វាយរៀងដឹកនាំដោយលោក ម៉ែន វិបុល អភិបាលខេត្ត រួមជាមួយអស់លោក លោកស្រីជា អភិបាលរងខេត្ត លោក លោកស្រីប្រធានមន្ទីរទាំងបួនក្នុងបន្ទុកគណៈកម្មការ។
ក្រោយពីលោក ម៉ែន វិបុល អភិបាលខេត្តស្វាយរៀង អាននូវរបាយណ៍វឌ្ឍនភាពការងាររបស់រដ្ឋបាលខេត្ត និងការអភិវឌ្ឍលើវិស័យនានា និងការលើកឡើងនូវរបាយការណ៍របស់មន្ទីរទាំង៤ លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា បានថ្លែងនូវកោតសរសើរដល់កិច្ចខិតខំប្រឹងប្រែងរបស់រដ្ឋបាលខេត្ត ជាពិសេសមន្ទីរពាក់ព័ន្ធនាពេលនេះ ធ្វើឲ្យគណ:ប្រតិភូបានឈ្វេងយល់កាន់តែច្បាស់ពីស្ថានភាពជាក់ស្តែងក្នុងវិស័យនីមួយៗ ដោយក្តាប់យកនូវភាពខ្លាំង និងបញ្ហាប្រឈមនៃវិស័យក្នុងបន្ទុក ក៏ដូចជាយន្តការក្នុងការអនុវត្តការងាររបស់មន្ទីរនីមួយៗ ដើម្បីដោះស្រាយបញ្ហាប្រឈមទាំងអស់នោះផងដែរ៕ ដោយ៖វ៉ៃកូ
