ខេត្តព្រះសីហនុ៖ តាមរបាយការណ៍ របស់សមត្ថកិច្ចកងរាជអាវុធហត្ថខេត្តព្រះសីហនុ បានឲ្យដឹងថា មានករណីរបាក់រលំរបងថ្មបេតុង បណ្តាលឲ្យស្លាប់មនុស្សចំនួនពីរនាក់ កាលពីម៉ោង ២៣ និង៤០យប់ ថ្ងៃទី៩ ខែសីហា ឆ្នាំ២០១៩ នាក្រុងព្រះសីហនុ ពេលមេឃកំពុងមានភ្លៀងធ្លាក់ខ្លាំង។
របាយការណ៍ដដែលបញ្ជាក់ថា ហេតុការណ៍បាក់រលំរបងថ្មបេតុង សង្កត់កម្មករខាងលើនេះ បានបណ្តាលឲ្យស្លាប់មនុស្សចំនួនពីរនាក់។ ហើយថា ជនរងគ្រោះទាំងពីរនាក់ គឺត្រូវជាប្តីប្រពន្ធ រស់នៅជាមួយគ្នា នៅម្តុំចំការតាស្រៀងឃ្លាំងលើ ស្ថិតក្នុងក្រុមទី២១ ភូមិ២ សង្កាត់លេខ១ ក្រុងព្រះសីហនុ។
សាកសពជនរងគ្រោះជាប្តីឈ្មោះ ស៊ុន គឺមសាន អាយុ៥៤ឆ្នាំ និង
សាកសពជនរងគ្រោះជា ប្រពន្ធឈ្មោះ សេង ញ៉េន អាយុ៥៦ឆ្នាំ។ ជនរងគ្រោះទាំងពីរនាក់ មានស្រុកកំណើភូមិរើលក្រោម ឃុំដូនតី ស្រុកពញាក្រែក ខេត្តកំពង់ចាម។
បច្ចុប្បន្នសាកសពជនរងគ្រោះទាំងពីរនាក់ បានដឹកយកទៅរក្សាទុក នៅមន្ទីរពេទ្យបង្អែកខេត្ត ព្រះសីហនុ ឬមន្ទីរពេទ្យចំការចេក រង់ចាំការពិនិត្យ របស់សមត្ថកិច្ចនគរបាលបច្ចេកទេសវិទ្យាសាស្ត្រ និងរង់ចាំសាច់ញាតិមកទទួលយកទៅធ្វើបុណ្យតាមប្រពៃណីជាតិខ្មែរ៕ ដោយ៖ ដែន សីមា