ខេត្តព្រះសីហនុ៖ ក្រសួងរៀបចំដែនដី នគរូបនីយកម្ម និងសំណង់ បានសម្រេចឲ្យម្ចាស់អគារកម្ពស់៩ជាន់ មួយកន្លែង មានទីតាំងស្ថិតនៅទល់មុខរង្វង់មូលតោ២ ស្ថិតិក្នុងភូមិ៤ សង្កាត់លេខ ៤ ក្រុង-ខេត្តព្រះសីហនុ រុះរើចេញ បន្ទាប់ពីមន្ត្រីជំនាញរកឃើញថា អគារខាងលើនេះ ស្ថាបនាឡើងខុសបច្ចេកទេស និងគ្មានគុណភាព។
សំណង់អគារនេះ សាងសង់ដោយក្រុមហ៊ុន ឈួនរិន ខនស្ត្រាក់សិន អេនជីនារីង (ខេមបូឌា) ឯ.ក។
យោងតាមសេចក្តីប្រកាសព័ត៌មាន របស់ក្រសួងរៀបចំដែនដី ចុះថ្ងៃទី៩ ខែសីហា ឆ្នាំ២០១៩ បានបញ្ជាក់ថា កាលពីព្រឹកមិញនេះ ក្រុមការងារបច្ចេកទេស នៃក្រសួងរៀបចំដែនដី នគរូបនីយកម្ម និងសំណង់ និងមន្ទីររៀបចំដែនដីខេត្តព្រះសីហនុ បានចុះត្រួតពិនិត្យការដ្ឋានសំណង់អគារពហុមុខងារមានកម្ពស់ ៩ជាន់ខាងលើនេះ។
ចំពោះលទ្ធផល បន្ទាប់ពីមន្ត្រីជំនាញបានចុះពិនិត្យដោយយកចិត្តទុកដាក់បានរកឃើញថា សំណង់នេះ សាងសង់ឡើង ដោយគ្មានលិខិតអនុញ្ញាត និងគ្មានលិខិតអនុញ្ញាតឲ្យបើកការដ្ឋានសាងសង់នោះទេ។
សូមបញ្ជាក់ថា កាលពីល្ងាចថ្ងៃទី៧ ខែសីហា ឆ្នាំ២០១៩ មានការភ្ញាក់ផ្អើលថា មានករណីប្រេះតួអគារពហុមុខងារកម្ពស់៩ជាន់ យីហោ “ផ្ទះនាគ” មានទីតាំងនៅជិតរង្វង់មូលតោពីរ ក្រុងព្រះសីហនុ..។
ភ្លាមៗ ក្រោយមានការភ្ញាក់ផ្អើលនេះ មន្ត្រីរដ្ឋបាលខេត្តព្រះសីហនុ និងអាជ្ញាធរមូលដ្ឋាន ក៏បានចុះទៅពិនិត្យផ្ទាល់ដល់ទីតាំងអគារប្រេះបែកនោះ ដើម្បីពិនិត្យរកការពិត និងរាយការបម្រជូនថ្នាក់ដឹកនាំថ្នាក់លើ។
កាលណោះ មន្ត្រីរដ្ឋបាលខេត្តព្រះសីហនុ និងមន្ត្រីជំនាញស្ថាប័នពាក់ព័ន្ធ បានព្យាយាមមិនប្រាប់ឈ្មោះអគារប្រេះបែកជាន់ជសប់ដីនោះថាបែបណាទេ ដោយបញ្ជាក់ខ្លីថា រង់ចាំ ឲ្យមន្ត្រីជំនាញថ្នាក់ជាតិ ចុះមកពិនិត្យបច្ចេកដោយផ្ទាល់ឲ្យបានត្រឹមត្រូវជាមុនសិន។
ចំពោះបញ្ហាខាងលើនេះ ប្រជាពលរដ្ឋរស់នៅក្រុងព្រះសីហនុ ក៏បានទទូចដល់មន្ត្រីជំនាញ ស្ថាប័នពាក់ព័ន្ធ ក៏ដូចជាថ្នាក់ដឹកនាំរដ្ឋបាលខេត្តព្រះសីហនុ ឲ្យបង្ហាញលទ្ធផល ដែលជំនាញបានចុះពិនិត្យអគារប្រេះ កម្ពស់៩ជាន់ មានទីតាំងនៅម្តុំជិតរង្វង់មូលតោពីរ ដើម្បីឲ្យប្រជាពលរដ្ឋបានដឹងជាសាធរណៈផងដែរ។ ហើយពេលនេះ លទ្ធផលនៃការចុះត្រួតពិនិត្យគុណភាព និងបច្ចេកទេសសាងសង់អគារកម្ពស់ ៩ជាន់នោះ ត្រូវបានប្រកាសការពិត ដោយក្រសួងេបចំ ដែនដីនគររូបនីយកម្ម និងសំណង់ ដោយបានចេញប្រកាសលទ្ធផលជាផ្លូវការ ជូនប្រជាពលរដ្ឋ និងមហាជន បានដឹងជាសាធារណៈរួចហើយ គឺសំណង់កម្ពស់៨ជាន់នោះ ត្រូវក្រសួងរៀបចំដែនដី សម្រេចឲ្យរុះរើ សំណង់អគារនោះ មិនឲ្យដំណើរការ ឬបើធ្វើអាជីវកម្មទៀតទេ ក្រោយរកឃើញថា សំណង់ខាងលើនេះសង់គ្មានគុណភាព៕ ដោយ៖ ដែន សីមា
