ខេត្តស្វាយរៀងៈ ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ជាជនងាយរងគ្រោះ នៅទីស្នាក់ការអនុសាខាកាកបាទក្រហមកម្ពុជាក្រុងស្វាយរៀង នាព្រឹកថ្ងៃទី១០ ខែសីហា ឆ្នាំ២០១៩នេះ ក្រុមការងារសាខាកាកបាទក្រហមកម្ពុជាខេត្ត ដឹកនាំដោយលោក ម៉ែន វិបុល ប្រធានគណៈកម្មាធិការសាខា ព្រមទាំងសមាជិក សមាជិកការនៃគណៈកម្មាធិការសាខា នាំយកអំណោយមនុស្សធម៌ និងសំណេះសំណាល សួរសុខទុក្ខ ព្រមទាំងចែកអំណោយជូនចាស់ជរាគ្មានទីពឹង ចំនួន២៩នាក់ ជនពិការ ៤ នាក់ អ្នករស់នៅជាមួយមេរោគអេដស៍ ២ នាក់ និងគ្រួសារ មានជីវភាពខ្វះខាត ៥៤ គ្រួសារ សរុប ៨៩ គ្រួសារ មកពី ៧ សង្កាត់ ក្នុងក្រុងស្វាយរៀង ។
មានប្រសាសន៍សំណេះសំណាលនាឱកាសនោះ លោក ម៉ែន វិបុល បានពាំនាំនូវសេចក្ដីនឹករលឹក ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតគូរសុខទុក្ខ ដល់ប្រជាពលរដ្ឋ ដែលជាជនងាយរងគ្រោះ និងរងគ្រោះដោយគ្រោះមហន្តរាយផ្សេងៗ លោកបានបញ្ជាក់បន្ថែម ដល់អ្នកទទួលអំណោយទាំង ៨៩ គ្រួសារ ដោយសង្ខេបអំពីសកម្មភាពនានា របស់កាកបាទក្រហមកម្ពុជា នៅថ្នាក់សាខា និងអនុសាខា បានយកចិត្តទុកដាក់ និងដោះស្រាយបន្ទាន់ ដល់គ្រួសារដែលរងគ្រោះដោយសារគ្រោះធម្មជាតិ ដូចជា ខ្យល់កន្ត្រាក់ រន្ទះបាញ់ គ្រោះថ្នាក់ចរាចរជាដើម ធ្វើឲ្យប្រជាពលរដ្ឋទាំងនោះបានធូរស្រាលមួយចំណែក ហើយពេលនេះសាខាបានគិតគូរដល់លោកតា លោកយាយ ចាស់ជរាដែលគ្មានទីពឹង អ្នករស់នៅជាមួយមេរោគអេដស៍ ជនពិការ កុមារកំព្រា ព្រោះមិនមែនតែក្រុងស្វាយរៀងមួយទេ ដែលសាខាត្រូវដោះស្រាយ គឺត្រូវដោះស្រាយដល់ស្រុក ក្រុងផ្សេងទៀត តាមលទ្ធភាពដែលសាខាមាន ។
អំណោយដែលចែកជូនទាំង ៨៩ គ្រួសារ ក្នុង ១ គ្រួសារទទួលបាន អង្ករ ៣០ គីឡូក្រាម កន្ទេលបត់ ១ មី ១ កេស ត្រីខ ១០ កំប៉ុង ទឹកស៊ីអ៊ីវ ៦ ដប មុង ១ ភួយ ១ ក្រមា ១ សារ៉ុង ១ និងថវិកា ៥០.០០០ រៀល ៕ដោយ៖ វ៉ៃកូ