តាកែវ ៖ ករណីឃាតកម្មដ៏ព្រៃផ្សៃបំផុតបានបង្កឡើងដោយបុរសជាប្តី ចិត្តតិរច្ឆានម្នាក់ បានយក ពូថៅវាយក្បាល និងយកកាំបិតអារកប្រពន្ធស្លាប់យ៉ាងអាណោចអាធ័មបំផុត ខណៈពេលដែលប្រពន្ធកំពុងតែអង្គុយចៀននំ នៅលើផ្ទះបាយ ដោយពុំបានដឹងខ្លួន។ ហេតុការដ៏រន្ធត់នេះបាន កើតឡើងនៅវេលាម៉ោង៩ និង២០នាទីព្រឹក ថ្ងៃទី១០ ខែសីហា ឆ្នាំ២០១៩ ស្ថិតនៅក្នុងភូមិកំពុងពោធិ៍ ឃុព្រែកផ្ទោល ស្រុកអង្គរបុរី ខេត្តតាកែវ ។
ជនល្មើសជាប្តីមានឈ្មោះ បាល់ ភឿនអាយុ ៤៨ ឆ្នាំ រីឯជនរងគ្រោះជាប្រពន្ធឈ្មោះ មុត ឃាង អាយុ ៥២ ឆ្នាំ បច្ចុប្បន្នកម្លាំងអធិការដ្ឋាននគរបាលស្រុកអង្គរបុរី បានចាប់ខ្លួនជនល្មើសបានភ្លាមៗ ហើយបាននិងកំពុងសួរចម្លើយជនល្មើសពីដើមហេតុ នៃការប្រព្រឹត្តិឃាតកម្ម សម្លាប់ប្រពន្ធយ៉ាងសាហាវព្រៃផ្សៃបែបនេះ ។
បើយោងតាមចម្លើយជនសង្ស័យបាននិយាយសារភាពចំពោះមុខសមត្ថកិច្ចថា មូលហេតុដែលឈានដល់កើតជាអំពើឃាតកម្មនេះ បណ្តាលមកពីការប្រច័ណ្ឌ។
លោកអធិការបានបន្តថា រឿងហេតុប្រច័ណ្ឌនេះបានកើតឡើងប្រហែលជាមួយឆ្នាំហើយ ប៉ុន្តែមានតែការឈ្លោះប្រកែកគ្នាបន្តិបន្តួចប៉ុណ្ណោះ ហើយជនសង្ស័យខាងលើតែងតែស្រវឹងរឿយៗ ឬស្រវឹងខួប តែថ្ងៃកើតហេតុជនសង្ស័យមិនស្រវឹងទេ ។
គួរឲ្យសង្វេគណាស់បន្ទាប់ពីឳពុកក្លាយជាឃាតករសម្លាប់ម្តាយឲ្យស្លាប់បាត់បង់ជីវិតហើយបានបន្សល់ទុកនូវកូនចំនួន ០៣ នាក់ ដោយគ្មានមេបាថែរក្សា ព្រោះឳពុកក៏ត្រូវជាប់ព័ន្ធធនាគារ ។ បច្ចុប្បន្នជនសង្ស័យខាងលើ សមត្ថកិច្ចកំពុងធ្វើការសាកសួរ ដើម្បីកសាងសំណុំរឿងតាមនិតិវិធីច្បាប់ ។
គួររំលឹកផងដែរថា អំពើរហិង្សារក្នុងគ្រួសារ បានកើតឡើងជាញឹកញាប់ ហើយតែងតែបណ្តាលឲ្យមានអ្នករបួស ហើយនឹងស្លាប់ ភាគច្រើនគឺបង្ករឡើង ដោយសារប្តី តែងតែប្រចណ្ឌប្រពន្ធ ដោយមិនបានគិតវែងឆ្ងាយ គឺបានបណ្តោយខ្លួនទៅតាមអារម្មណ៍ ដែលកំពុងតែខឹង និងពុះកញ្ជ្រោល ហ៊ានលើកដៃសម្លាប់មនុស្សដែលធ្លាប់ តែរស់នៅជាមួយគ្នា ឃើញមុខគ្នារាល់ថ្ងៃ ហើយអំពើរ ដែលអ្នកបានប្រព្រឹត្តិ កុំគិតថាអាចរួចខ្លួនឲ្យសោះ ច្បាប់គេនឹងកាត់ទោស នៅអ្វីដែលអ្នកបានធ្វើ ដូចជាករណីកាលពីប៉ុន្មានថ្ងៃ កន្លងទៅថ្មីៗនេះ មានករណីប្តី លើកដៃបាញ់ប្រហារ សម្លាប់ ប្រពន្ធ ដោយសារតែការប្រចណ្ឌ ចោទថាប្រពន្ធមានសាហាយ ហើយត្រូវបានសមត្ថកិច្ចចាប់វ៉ៃខ្នោះ ញាត់ចូលក្នុងគុក ដោយសារតែខ្លួន បានប្រព្រឹត្ត នៅអំពើដ៍ព្រៃផ្សៃនេះដែរ ៕ តាកែវ
