កោះកុង៖ មន្ទីរបរិស្ថានខេត្តកោះកុង បានឃាត់ខ្លួនជនសង្ស័យម្នាក់ពីបទកាប់គាស់ រុករានដីព្រៃ ឆ្ការ និងឈូសឆាយដីព្រៃដើម្បីយកដីធ្វើជាកម្មសិទ្ធិ។
មន្ទីរបរិស្ថានខេត្តកោះកុង បានចេញសេចក្តីប្រកាសព័ត៌មាន ថ្ងៃទី១១ ខែសីហា ឆ្នាំ២០១៩នេះថា ការឃាត់ខ្លួនជនសង្ស័យឈ្មោះ ចេត ប៊ុន ភេទប្រុស អាយុ៦៤ឆ្នាំ ពីបទកាប់គាស់ រុករានដីព្រៃ ឆ្ការ ដុត និង ឈូសឆាយដីព្រៃ ដើម្បីយកដីធ្វើជាកម្មសិទ្ធិ។
មន្ទីរបរិស្ថានខេត្តកោះកុង សូមជម្រាបជូនព័ត៌មានដល់ បងប្អូនប្រជាពលរដ្ឋ សាធារណជន និង អង្គការដៃគូអភិវឌ្ឍន៍នានា ជ្រាបថា៖ កាលពីថ្ងៃទី ១១ ខែសីហា ឆ្នាំ២០១៨ វេលាម៉ោងដប់មួយនឹងម្ភៃនាទីព្រឹក ក្រុមការងារមន្ទីរបរិស្ថានខេត្តកោះ កុងបានសហការជាមួយកម្លាំងកងរាជអាវុធហត្ថលើផ្ទៃប្រទេស និង កម្លាំងអង្គការសម្ព័ន្ធមិត្តសត្វព្រៃ បានចុះប្រតិបត្តិការបង្ក្រាបបទល្មើសធនធានធម្មជាតិត្រង់ចំណុចនិយាមកា៣៦១៣៤៣-១២៣៥២៧៩ ស្ថិតក្នុងរបៀបអភិរក្សជីវចម្រុះប្រព័ន្ធតំបន់ការពារធម្មជាតិ បានប្រទះឃើញមានការកាប់គាស់ រុករានដីព្រៃ ឆ្ការ ដុត និង ឈូសឆាយដីព្រៃ ដើម្បីយកដីធ្វើជាកម្មសិទ្ធិទំហំ០,៣៥ហិកតា ស្ថិតនៅភូមិតាធងឃុំដងពែង ស្រុកស្រែអំបិល ខេត្តកោះកុង ដែលបង្ករឡើងដោយជនសង្ស័យឈ្មោះ ចេត ប៊ុន ភេទប្រុស អាយុ៦៤ឆ្នាំ ទីកន្លែងកំណើតភូមិតាផង ឃុំដងពែង ស្រុកស្រែអំបិល ខេត្តកោះកុង។
ក្នុងលិខិតរបស់ការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកស្រែអំបិលបានបញ្ជាក់ថា ប្រពន្ធជនសង្ស័យឈ្មោះ ខន ថុន ស្នើសុំកាត់ឆ្វៀលផ្ទៃដីចំនួន១០ហិកតា ក្នុងនោះដី៥ហិកតា ជនសង្ស័យបានអាស្រ័យផល និង ធ្វើលំនៅដ្ឋានរស់នៅ ដោយគ្មានការហាមឃាត់ពីអាជ្ញាធរ និង ពីមន្ត្រីបរិស្ថានទេ ប៉ុន្តែដី៦ហិកតាទៀតជាដីអភិរក្សដែលមន្ត្រីបរិស្ថាន និងកម្លាំងអង្គការសម្ព័ន្ធមិត្តសត្វព្រៃ តែងតែធ្វើការណែនាំ
និង ហាមឃាត់ជនសង្ស័យកុំឲ្យកាប់ទន្ទ្រាន តែជនសង្ស័យ នៅតែព្យាយាមលួចកាប់ទន្ទ្រានដីអភិរក្សនោះដដែលទើបធ្វើឲ្យមានការឃាត់ខ្លួនជនសង្ស័យតែម្តង ។
ករណីដែលបង្កឡើងដោយជនសង្ស័យខាងលើនេះ វាផ្ទុយពីច្បាប់ ស្តីពីតំបន់ការពារធម្មជាតិ មាត្រា៦២ ចំណុច១៖ កាប់គាស់ រុករានដីព្រៃ ឆ្ការ ដុត និង ឈូសឆាយដីព្រៃ ដើម្បីយកដីធ្វើជាកម្មសិទ្ធិ ដែលតម្រូវឱ្យមន្ទីរបរិស្ថាន រៀបចំកសាងសំណុំរឿង បញ្ជូនទៅអយ្យការអមសាលាដំបូងខេត្ត ដើម្បីបន្តនីតិវិធីតាមផ្លូវច្បាប់៕ ដោយ ៖ កូឡាប