ប៉ូលិសហុងកុង បានប៉ះទង្គិចគ្នាសារជាថ្មីម្តងទៀតជាមួយនឹងក្រុមតវ៉ាប្រឆាំងរដ្ឋាភិបាល ខណៈដែលទីក្រុងហុងកុងកំពុងត្រូវញាំញីដោយសារតវ៉ាប្រឆាំងដ៏ធំ និងការចលាចល អស់រយៈពេល ១០សប្តាហ៍មកហើយ។ នេះបើតាមការចេញផ្សាយរបស់ BBC កាលពីព្រឹកថ្ងៃចន្ទនេះ។
ប៉ូលិសបានធ្វើការបាញ់ឧស្ម័នបង្ហូរទឹកភ្នែកនៅទូទាំងទីក្រុង កាលពីយប់ថ្ងៃអាទិត្យម្សិលមិញនេះ រួមមានការបាញ់ទៅលើស្ថាននីយ៍រថភ្លើង។
នៅក្នុងតំបន់ Wan Chai នៃទីក្រុង មានការគប់គ្រាប់បែកសាំង និងដុំឥដ្ឋទៅលើប៉ូលិសបង្រ្កាបកុបកម្ម ហើយប៉ូលិសបានឆ្លើយតបវិញដោយប្រើដំបង។
មនុស្សមួយចំនួន រួមមានមន្រ្តីប៉ូលិសម្នាក់ បានរងរបួសក្នុងការប៉ះទង្គិចនោះ។
ប៉ូលិសក៏ត្រូវបានគេឃើញ បាញ់គ្រប់កាំភ្លើងជ័រនៅចំងាយយ៉ាងជិត ដាក់ក្រុមបាតុករ នៅក្នុងស្ថានីយ៍រថភ្លើងក្រោមដី ខណៈក្រុមប៉ូលិសផ្សេងទៀត ត្រូវបានគេឃើញថា បានវាយប្រជាជនដោយដំបង។
សូមរំលឹកថា ទីក្រុងហុងកុងបានរងភាពចលាចលអស់រយៈពេលជាង ២ខែមកហើយ ដោយសារតែការតវ៉ាប្រឆាំងទៅនឹងច្បាប់ធ្វើបត្យាប័នដ៏ចម្រូងចម្រាស់ ដែលអនុញ្ញាតឲ្យមានការបញ្ជូនជនសង្ស័យយកទៅកាត់ទោសនៅប្រទេសចិនបាន។
ទោះបីជាមេដឹកនាំហុងកុង បានប្រកាសពីការពន្យារច្បាប់នោះទៅហើយក្តី ក៏ក្រុមបាតុករ មិនទាន់សុខចិត្ត និងបានទាមទារឲ្យបោះបង់ចោលច្បាប់នោះទាំងស្រុង និងឲ្យមេដឹកនាំហុងកុងគឺអ្នកស្រី Carrie Lam ចុះចេញពីដំណែង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC