ភ្លៀងម៉ូសុងធ្លាក់យ៉ាងខ្លាំងនៅក្នុងប្រទេសឥណ្ឌា បង្កឲ្យមានការរអិលបាកដី និងគ្រោះទឹកជំនន់ និងបណ្តាលឲ្យមនុស្សជាង ១៥០នាក់ស្លាប់បាត់បង់ជីវិត។ នេះបើតាមរបាយការណ៍របស់រដ្ឋាភិបាលឥណ្ឌា នៅថ្ងៃអាទិត្យម្សិលមិញនេះ។
តួលេខនៃអ្នកស្លាប់ទាំងអស់គឺ ១៥២នាក់ និង ១៧នាក់ទៀតកំពុងបាត់ខ្លួនទូទាំងរដ្ឋចំនួន ៤របស់ឥណ្ឌា។
មនុស្សច្រើនជាង ១៦៥.០០០នាក់ត្រូវបានជន្លៀសចេញពីផ្ទះសំបែងរបស់ពួកគេ និងកំពុងស្នាក់នៅជំរុំចំនួនជាង ១.៣០០កន្លែងនៅក្នុងរដ្ឋ Kerala ដែលក្នុងរដ្ឋនេះមានមនុស្ស ៦០នាក់ស្លាប់ដោយសារគ្រោះមហន្តរាយខាងលើ។ មន្រ្តីបញ្ជាក់ថា ផ្ទះជាង ២០០នៅក្នុងរដ្ឋនោះ ត្រូវបានបំផ្លាញដោយសារតែគ្រោះផ្សេងៗ បង្កឡើងដោយភ្លៀង។
ចំនែកនៅក្នុងរដ្ឋ Karnataka មនុស្សចំនួន ៣០នាក់បានស្លាប់ និង ១៤នាក់កំពុងបាត់ខ្លួន ដោយសារតែទឹកជំនន់។ អាជ្ញាធរនៃរដ្ឋនេះ បានជន្លៀសប្រជាជនចំនួនជាង ៣០.០០០នាក់ឲ្យទៅស្នាក់នៅជំរុំជិត ១០០០។
សូមបញ្ជាក់ថា ជារៀងរាល់ឆ្នាំ ភ្លៀងម៉ូសុងនៅក្នុងប្រទេសឥណ្ឌា តែងបង្កឲ្យមនុស្សជាច្រើននាក់បាត់បង់ជីវិត និងផ្ទះរាប់រងខ្នងត្រូវរងការបំផ្លិចបំផ្លាញ។ ភ្លៀងម៉ូសុងនឹងមានរយៈពេលរហូតដល់ខែកញ្ញាខាងមុខ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia