ខេត្តស្វាយរៀង៖ លោកស្រី ហួយ ស៊ីខេង ប្រធានអង្គការអង្គការមូលនិធិថែទាំសុខភាពអ្នកជំងឺអេដស៍ (AHF) បានថ្លែងថា ជំងឺអេដស៍បានថយចុះនៅសល់ត្រឹម0,៧%ក្នុងខេត្តស្វាយរៀង។
លោកស្រីបានថ្លែងបែបនេះ នៅវិទ្យាល័យស្វាយរៀងក្នុងពិធីទិវាអន្តរជាតិដើម្បី (រក្សាសន្យា) លើកកម្ពស់យុវជននៅជុំវិញពិភពលោក ដោយមានការអញ្ជើញចូលរួមពីលោកពិន ដារ៉ា អនុប្រធានមន្ទីរ អបរំ ខេត្តស្វាយរៀង លោកគ្រូអ្នកគ្រូសិស្សប្រមាណជាង៣០០នាក់ នៅព្រឹកថ្ងៃទី១២ សីហា ឆ្នាំ២០១៩ ដែលបានរៀបចំឡើងដោយអង្គការAHFកម្ពុជា។
លោកស្រីបានបន្តថា អង្គការមូលនិធិថែទាំសុខភាពអ្នកជំងឺអេដស៍ (AHF) ដែលជាអង្គការប្រយុទ្ធនឹងជំងឺអេដស៍ធំជាងគេបំផុត នៅលើពិភពលោក កំពុងប្រតិបត្តិការនៅក្នុង ៣៤ ប្រទេស បានរៀបចំដើម្បីអបអរទិវាយុវជនអន្តរជាតិ ជាថ្ងៃចងចាំ ដែលបានបង្កើតឡើងដោយអង្គការសហប្រជាជាតិនៅឆ្នាំ ១៩៩៩ក្នុងការផ្ដល់សិទ្ធិអំណាច ដល់យុវជនទូទាំងពិភពលោក ក្នុងការធ្វើជាដៃគូសម្រាប់ការផ្លាស់ប្ដូរ និងផ្ដល់ការយល់ដឹង អំពីបញ្ហាប្រឈមនានា ដែលគេជួបប្រទះក្នុងជីវិតប្រចាំថ្ងៃ។
លោកស្រីបានបន្តទៀតថា ទោះបីមានការថយចុះនៅសល់ ត្រឹម0,៧% ក៏ដោយសម្រាប់ខេត្តស្វាយរៀង តែសូមឲ្យប្អូនប្អូនសិស្សានុសិស្សចៀសចេញឲ្យឆ្ងាយ ពីគ្រឿងញៀន ដែលនាំឲ្យប៉ះពាល់ដល់សុខភាព សតិអារម្មណ៍ និងអំពីបញ្ហាសុខភាពបង្កនូវភាពអវិជ្ជមាន ដែលសង្គមគេស្អប់ខ្ពើម ម្យ៉ាងវិញទៀត យើងជាសិស្សានុសិស្ស ជាសសរទ្រូងនៃប្រទេសជាតិ ត្រូវចាប់យកតែអំពើល្អ និងខិតខំរៀនសូត្រយកចំណេះវិជ្ជា ដើម្បីទៅថ្ងៃអនាគត។
លោកស្រីក៏បានធ្វើការអំពាវនាវដល់ថ្នាក់ដឹកនាំទាំងអស់ ហើយបង្កើតឲ្យបាននូវពិភពលោកមួយ ដែលមានសមត្ថភាពកាន់តែទូលំទូលាយ សម្រាប់យុវជននៅគ្រប់ទីកន្លែង និងគ្រប់រូបដើម្បីធានាបានថា ពួកគេមានលទ្ធភាពទទួលបានសេវាថែទាំសុខភាព និងការអប់រំទូទៅពួកគេ ត្រូវការរស់រៀនមានជីវិត ដែលមានភាពសប្បាយរីករាយ និងជីវិតដែលត្រូវទទួលបានជោគជ័យ រួមទាំងការទទួលសេវាការពារអាយុជីវិត ការធ្វើតេស្តមេរោគអេដស៍ ការពារនិងព្យាបាលផងដែរ។
ជាចុងក្រោយលោកស្រី ក៏បានធ្វើការកោតសរសើរដល់លោក លោកស្រី ដែលជាប្រធានស្ថាប័ន ដែលមានការពាក់ព័ន្ធទាំងអស់ ដែលបានចូលរួមសហការជាមួយអង្គការ AHF ដែលបានដឹកនាំក្រុមការងារ ចុះជួយផ្សព្វផ្សាយ បានទូលំទូលាយដល់យុវជនជំនាន់ក្រោយ ឲ្យពួកគាត់យល់ដឹងអំពីបញ្ហាអេដស៍ និងការប្រើប្រាស់គ្រឿងញៀន វាធ្វើឲ្យប៉ះពាល់ដល់សុខភាពរស់នៅ ព្រមទាំងបានបំផ្លាញថវិកាផ្ទាល់ខ្លួន និងក្រុមគ្រួសារសាច់ញាតិទៀតផង៕ ដោយ៖វ៉ៃកូ